مغیرہ ابن شعبہ

صلح حدیبیہ کے وقعہ پر جب عروہ بن مسعود ثقفی نے پرانے طریقے کے مطابق حضور صلی اللہ علیہ و آلہ وسلم کی ریش مبارک کی طرف ہاتھ بڑھایا تو آپ نے اسے جھاڑ دیا۔ حالانکہ ذاتی طور پر اس کے آپ پر بہت سے احسانات تھے۔ بیعت رضوان میں شامل ہوئے۔ آپ کو غزوہ خیبر، فتح مکہ اور غزوہ تبوک میں شمولیت کا شرف حاصل ہوا۔ آپ کا قبیلہ 9 ہجری میں مسلمان ہوا۔ قبول اسلام کے بعد بھی ان کے قبیلے کے لوگ اپنے بت لات سے خوفزدہ تھے۔ چنانچہ حضور اکرم کے حکم سے مغیرہ بن شعبہ نے جاکر نہ صرف لات کے بت کو توڑا بلکہ اس کا مندر بھی ڈھا دیا۔ اور اس کی بنیادیں تک کھود ڈالیں۔

عہد صدیقی میں مغیرہ بن شعبہ نے مسیلمہ کذاب کے خلاف جنگ میں حصہ لیا۔ عہد فاروقی میں ایران کے خلافجنگ قادسیہ سے پہلے مسلمانوں کے سفیر کے فرائض بہت جرات سے سر انجام دیے اور جنگ میں شرکت بھی کی۔ یزد گرد کی آخری لڑائی معرکہ نہاوندمیں آپ فوج کے اعلی سالاروں میں تھے۔ مردان شاہ کے پاس سفیر بنا کر بھی آپ ہی کو بھیجا گیا۔ جنگ میں کامیابی کے بعد ایران کے لیڈروں کی تسخیر شروع ہوئی تو آپ کو ہمدان پر قبضے کے لیے بھیجا گیا۔

مغیرہ بن شعبہ بہادر جرنیل ہی نہیں اچھے منتظم، مدبر اور سیاست دان بھی تھے۔ عہد فاروقی میں کوفہ و بحرین کے گورنر مقرر کیے گئے۔ عثمان پر باغیوں نے حملہ کیا تو آپ نے عثمان کو مشورہ دیا کہ تین میں سے ایک صورت اختیار فرمائیے۔ جانثاوں کو لے کر مفسدوں کا مقابلہ کیجیے یا مکہ معظمہ چلے جائیے کہ حدود حرم میں کوئی آپ پر حملہ نہ کر سکے گا۔ تیسری صورت یہ ہے کہ شام چلے جائیے کہ امیر معاویہ وہاں موجود ہیں اور وہاں امن و امان ہے۔ لیکن عثمان نے یہ مشورہ قبول نہ کیا۔ شہادت عثمان کے بعد علی خلیفہ بنے۔ تو آپ نے انہیں مشورہ دیا کہ سارے اموی گورنر معزول نہ کریں یا کم از کم معاویہ کو فی الحال معزول نہ کریں۔ ورنہ اس کے نتائج غلط نکلیں گے۔ علی نے یہ مشورہ قبول نہ کیا۔

مغیرہ بن شعبہ امیر معاویہ کے معتمد علیہ مشیر تھے۔ انہوں نے مغیرہ کو کوفہ کا گورنر بنایا۔ مغیرہ نے خوارج کا کامیابی سے مقابلہ کیا۔زیاد بن ابیہ کو امیر معاویہ کی بیعت پر آمادہ کرنے والے مغیرہ ہی تھے۔ حجر بن عدی اور ان کے ساتھیوں کی شدید تنقید کے باوجود آپ نے ان کے خلاف کارروائی نہ کی۔ کیونکہ ان کے خون سے اپنے ہاتھ رنگنا پسند نہ کرتے تھے۔ یزید کی ولی عہدی کی تجویز بھی آپ ہی نے پیش کی تھی