அதிசர்

அதிசர் (கிபி 982 - 1054) இந்தியாவின் வங்காள பௌத்த சமய பிக்கு ஆவார்.[2] வங்காள பாலப் பேரரசில் (தற்கால வங்காளதேசம், முன்சிகஞ்ச் மாவட்டம்) விக்கிரம்பூரில் பிறந்தவர். பிக்குவாக துறவறம் ஏற்று, நாலந்தா பல்கலைக்கழகத்தில் பௌத்த சாத்திரங்களை பயின்றவர்.[3][4]

அதிசர்
கையில் ஏட்டுச் சுவடியுடன் அதிசரின் ஓவியம் [1]
தாய்மொழியில் பெயர்	অতীশ দীপংকর শ্রীজ্ঞান அதிசா தீபம்கர சிறீஞானம்
பிறப்பு	980 விக்கிரம்பூர், பாலப் பேரரசு (முன்சிகஞ்ச், வங்காளதேசம்)
இறப்பு	1054 நயாதாங், திபெத்
பணி	பௌத்த குரு
அறியப்படுவது	திபெத்தில் சர்மா பௌத்த குருகுல மரபை தோற்றுவித்தவர்

அதிசரின் சுவர் ஓவியம், ராலுங் மடாலயம், திபெத், 1993

அதிசர் கிபி 11ம் நூற்றாண்டில் மகாயானம் மற்றும் வஜ்ஜிராயன பௌத்த தத்துவங்களை திபெத் முதல் சுமத்திரா வரையிலான அசிய நாடுகளில் பரப்புவதில் முன்னிலை வகித்தவர். திபெத்தில் சர்மா பௌத்த குருகுல மரபை தோற்றுவித்தவர்.[3][4]

கிபி 1013ல் சிறீவிஜயம் எனப்படும் தற்கால மலேசியா மற்றும் இந்தோனேசியா பகுதிகளில் 12 ஆண்டுகள் தங்கி, பௌத்த சமயத்தை அப்பகுதிகளில் பரப்பியவர். நவீன பௌத்த சமயத்தின் புகழ் பெற்றவராக கருதப்படும் அசிதரின் மாணவரான திரோம்டன் என்பவர் திபெத்தில் கதம் பௌத்த தத்துவத்தை நிறுவியவர் ஆவார். [5]

நாகார்ச்சுனர், சந்திரகீர்த்தி அசங்கர் மற்றும் வசுபந்து போன்ற பௌத்த அறிஞர்கள் வழியில் வந்தவர் அதிசர்.[6] அதிசரின் குருமார்களில் முக்கியமாகக் கருதப்படுபவர் தர்மகீர்த்திசிறீ ஆவார்.[7]