قدیم فارسی

فارسی قدیم کا یہ میخی خط یوں تو آرامی سے ماخوذ ہے مگر فارسیوں نے اس میں حرف علت کی بجائے سلیبی حروف استعمال کرکے اس کی پیچیدگی دور کردی تھی، یہ زبان سنسکرت سے ملتی جلتی تھی اور بائیں سے دائیں لکھی جاتی تھی۔ اس کے حروف کی تعداد 36 ہیں اور چار سو سے زیادہ علامتی الفاظ بھی اس میں جوں کے توں رائج رہے۔ چند علامتی حروف یہ ہیں خشائی ثیا (بادشاہ)، دھیاوش (ملک)، بومِش(زمین)، اہورمزد( خدا) اور بَگ(دیوتا)وغیرہ اس رسم الخط میں الفاظ کو جُدا رکھنے کے لیے ایک فل سٹاپ بھی موجود تھا اور ساتھ ہی سو تک گنتی بھی موجود تھی۔

اصطخر کے شاہی قبرستان کا کتبہ

ہخامنش کے عہد میں یہی زبان فوجی اور شاہی زبان کی حیثیت رکھتی تھی۔ اس عہد کے جتنے بھی کتبے دستیاب ہوئے وہ بالعموم فارسی قدیم میں تھے۔ فارسی قدیم کے دریافت شدہ کتبوں میں سب سے مشہور کتبہ بہتون ہے یہ کتبہ تین زبانوں فارسی قدیم، عیلامی اور بابلی میں ہے۔ دوسرا مشہور کتبہ” نقشِ رستم“ہے جو دارا اوّل کے آباد کردہ شہر اصطخر کے شاہی قبرستان میں بادشاہوں کی قبروں پر تحریر ہے۔ فارسی قدیم، پارسیوں کی مذہبی زبان تھی اور ان مذاہب کی اولین تحریریں اور مذہبی احکام اسی خط میں لکھے جاتے تھے۔ قدیم فارسی کے بہت سے الفاظ ایسے بھی ہیں جو آج جدید فارسی میں شامل ہیں، مثال کے طور پر اصطخرکے شاہی قبرستان میں بادشاہ کیخسرو کے مقبرے سے دریافت شدہ قدیم فارسی کی یہ حمد ملاحظہ کیجیے:

قدیم فارسی میں کیخسرو کی حمد

بَگَ وَزرَکَ اوُرَمَزدَا ہیَا

اِمَام بُمِم ادَدَا ہیَا

اوَمَ اَسمانم ادَدَا ہیَا

مَرتِیَم ادَدَا ہیَا

شِئیَتِم ادَدَا مَرتیَی ہیَا

خداوند عظیم اہورمزداہے وہ،

جس نے بنائی یہ زمین،

جس نے بنایا یہ آسمان،

جس نے بنائے انسان،

جس نے چیزیں بنائیں انسانوں کے لیے

اس حمد میں موجود اکثر الفاظ بُمِم(بھومی یعنی زمین)، اَسمانم(آسمان)، مَرتِیَم(مرد) اور شِئیَتِم(شی) وغیرہ آج بھی فارسی اورسنسکرت زبان میں ملتی ہیں۔

عام بول چال کے کئی الفاظ آج بھی اردو میں مستعمل ہیں مثلاً:

الفاظ معنی

فارسی قدیم کے علاوہ ایران میں ایک زبان ”اوستائی“ بھی رائج تھی، پھریونانیوں کے حملہ کے بعد جب پارتھیوں کی حکومت آئی تو ان کی زبان ”پرتو“ جو بعد میں پہلوی کہلائی، بھی زبان زدعام ہو گئی تھی۔ چنانچہ لوگوں نے قدیم فارسی کے دشوار میخی خط کو چھوڑ دیا اور ساسانی دور آنے تک ایران میں صرف اوستائی اور پہلوی زبان ہی باقی رہ سکیں۔[2]