استنبول

باسفورس پل اور یورپی علاقے میں بلند عمارات

استنبول آبنائے باسفورس کے جنوبی علاقے میں دونوں جانب واقع ہے اس طرح وہ دو براعظموں میں واقع دنیا کا واحد شہر ہے۔ شہر کا مغربی حصہ یورپ جبکہ مشرقی حصہ ایشیا میں ہے۔ شہری حدود ایک ہزار 539 مربع کلومیٹر تک ہیں جبکہ صوبہ استنبول 5 ہزار 220مربع کلومیٹر پرمحیط ہے ۔

استنبول شمالی اناطولیہ کی زلزلے کی پٹی کے قریب واقع ہے جو شمالی اناطولیہ سے بحیرہ مرمرہ تک جاتی ہے۔ افریقی اور یوریشین پلیٹ یہی پر ملتی ہیں۔ اس زلزلے کی پٹی کے باعث خطہ زلزلوں کا مرکز ہے۔ 1509ء میں ایک زلزلے کے نتیجے میں سونامی پیدا ہوا جس میں 10ہزار لوگ ہلاک اور 100 سے زائد مساجد تباہ ہوئیں۔ 1766ء میں ایوب مسجد مکمل طور پر شہید ہو گئی۔ 1894ء کے زلزلے میں استنبول کے ڈھکے ہوئے بازار کا بیشتر حصہ تباہ ہو گیا۔ اگست 1999ء کے تباہ کن زلزلے کے نتے جد میں 18 ہزار اور 2001ء کے موسم سرما میں 41 افراد ہلاک ہوئے۔ شہر میں موسم گرما گرم اور پرنم جبکہ سردیوں میں بارش اور کبھی کبھار برف باری کے ساتھ شدید سردی پڑتی ہے۔ شہر میں سالانہ اوسطاً 870 ملی میٹر بارش پڑتی ہے۔ موسم سرما کے دوران میں اوسطاً درجہ حرارت 7 سے 9 ڈگری سینٹی گریڈ تک رہتا ہے جس کے دوران میں برف باری بھی عموماً ہوتی رہتی ہے۔ جون سے ستمبر تک موسم گرما کے دوران میں دن میں اوسطاً درجہ حرارت 28ڈگری سینٹی گریڈ رہتا ہے۔ سال کاگرم ترین مہینہ جون ہے جس میں اوسط درجہ حرارت 23.2ڈگری سینٹی گریڈ ہے جبکہ سال کا سرد ترین مہینہ جنوری ہے جس کا اوسط درجہ حرارت 5.4 ڈگری سینٹی گریڈ ہے۔ شہر میں سب سے زیادہ حرارت اگست 2000ء میں 40.5ڈگری سینٹی گریڈ ریکارڈ کیا گیا۔

استنبول کی بلند عمارات کا ایک دلکش نظارہ

استنبول کے اضلاع کو تین اہم علاقوں میں تقسیم کیا گیا ہے :

قدیم قسطنطنیہ کا تاریخی جزیرہ نما امینونو اور فاتح کے اضلاع پرمشتمل ہے۔ عثمانی دور کے اواخر میں استنبول کہلایا جانے والا یہ علاقہ شاخ زریں کے جنوبی ساحلوں پرقائم ہے جو قدیم شہر کے مرکز کو یورپی علاقے کے شمالی علاقوں سے جدا کرتی ہے۔ اس جزیرہ نما کے جنوب کی جانب سے بحیرہ مرمرہ اور مشرق میں باسفورس نے گھیرا ہوا ہے۔ شاخ زریں کے شمال میں تاریخی بے اوغلو اور بشکطاش کے اضلاع واقع ہیں جہاں آخری سلطان کا محل واقع ہے۔ ان کے بعد باسفورس کے ساحلوں کے ساتھ ساتھ اورتاکوئے اور بیبک کے سابق دیہات واقع ہیں۔ باسفورس کے یورپی اور ایشیائی دونوں جانب استنبول کے امرا نے پرتعیش رہائشی مکانات تعمیر کررکھے ہیں جنہیں یالی کہا جاتا ہے۔ ان مکانات کو موسم گرما کی رہائش کے طور پراستعمال کیا جاتا ہے۔ اسکودار اور قاضی کوئے شہر کے ایشیائی حصے ہیں جو دراصل آزاد شہر تھے۔ آج یہ جدید رہائشی اور کاروباری علاقوں پر مشتمل ہے اور استنبول کی تقریباً ایک تہائی آبادی یہاں رہائش پذی رہے۔ دفاتر اور رہائش کی حامل بلند عمارات یورپی حصے کے شمال علاقوں میں واقع ہیں جن میں خصوصاً لیونت، مسلاک اور اتیلر کا علاقہ شامل ہیں جو باسفورس اور فاتح سلطان محمد پلوں کے درمیان میں واقع ہے ۔

اورتاکوئے مسجد اور باسفورس پل، رات کے وقت

استنبول کی آبادی 1980ء سے 2005ء کے 25سالہ عرصے کے دوران میں تین گنا سے بھی زیادہ ہو گئی ہے۔ اندازہً 70فیصد سے زائد شہری استنبول کے یورپی حصے میں جبکہ 30 فیصد ایشیائی حصے میں رہتے ہیں۔ جنوب مشرقی ترکی میں بے روزگاری میں اضافے کے باعث خطے کے لوگوں کی اکثریت استنبول ہجرت کرگئی جہاں وہ شہر کے نواحی علاقوں غازی عثمان پاشا، ضیا گوک الپ و دیگر میں قیام پزیر ہو گئی۔

ترکی میں اعلیٰ تعلیم کے بہترین اداروں میں سے چند استنبول میں واقع ہیں جن میں سرکاری و نجی جامعات بھی شامل ہیں۔ اکثر معروف جامعات سرکاری ہیں لیکن حالیہ چند سالوں میں نجی جامعات کی تعداد میں بھی اضافہ ہواہے۔ معروف سرکاری جامعات میں استنبول تکنیکی جامعہ، باسفورس جامعہ، غلطہ سرائے جامعہ، استنبول جامعہ، مارمرہ جامعہ، یلدیز تکنیکی جامعہ اور معمار سنان فنون لطیفہ جامعہ شامل ہیں۔

لائبریریاں

• سلیمانیہ کتب خانہ
• استنبول چلک گولرسوئے کتب خانہ
• توپ قاپی محل کتب خانہ
• آرکیولوجیکل میوزیم کتب خانہ
• اتاترک کتب خانہ
• گوئٹے انسٹی ٹیوٹ کتب خانہ
• امریکن کتب خانہ

لیونت میں قائم بلند عمارات

استنبول اپنے بہترین محل وقوع اور زمینی و بحری راستوں کے بین الاقوامی پر موجودہ ہونے کے باعث ہمیشہ ہی سے ترکی کی اقتصادیات کا مرکز رہا ہے۔ ترکی کے صنعتی مزدوروں کا 20 فیصد استنبول میں روزگار سے وابستہ ہے جبکہ شہر ترکی کے صنعتی شعبے کا 38 فیصد حصہ ادا کرتا ہے۔ علاوہ ازیں شہر ترکی کی تجارت کا 55 فیصد اور تھوک تجارت کا 45 فیصد اور مجموعی قومی پیداوار کا 21.2 فیصد پیدا کرتا ہے۔ ملک بھر میں محصولات کا 40 فیصد حصہ استنبول ادا کرتا ہے اور ترکی میں قومی مصنوعات کا 27.5 فیصد تیار کرتا ہے ۔

مسلک میں قائم بلند عمارات

1990ء کی دہائی میں ایشیائی مالی بحران اور روس میں بحران کے باعث ترکی خصوصاً استنبول کی معیشت کو شدید دھچکے پہنچے۔ جولائی 1997ء سے 1998ء کے اوائل تک ایشیائی بحران اور اگست 1998ء سے 1999ء کے وسط تک روسی بحران کے باعث ترکی کی معیشت خصوصاً برآمدات پر منفی اثرات مرتب ہوئے۔ شہر کی اقتصادیات کو دوسرا دھچکا 17اگست 1999ء کو زلزلے سے لگا جس کے نتے ج میں اس کے جی ڈی پی میں دو فیصد کمی واقع ہوئی۔

اس کے باوجود استنبول کی معیشت حالیہ چند سالوں سے دوبارہ بہتری کی جانب گامزن ہے۔ استنبول ترکی کا صنعتی مرکز ہے۔ ترکی کے کئی بڑے کارخانے یہیں واقع ہیں۔ استنبول اور اس کے نواحی صوبہ جات کپاس، پھل، زیتون کا تیل، ریشم اور تمباکو پیدا کرتے ہیں۔ شہر کی اہم مصنوعات میں غذائی مصنوعات، کپڑا، تیل، ربڑ، دھاتی اشیاء، چمڑے کی اشیائ، کیمیکل، برقی مصنوعات، شیشہ، مشینری، کاغذ اور الکوحل کے مشروبات شامل ہیں۔ شہر میں گاڑیاں اور ٹرک بھی اسنبل کیے جاتے ہیں۔

استنبول کی معیشت کا ایک اہم شعبہ سیاحت بھی ہے۔ شہر میں ہزاروں ہوٹل اور سیاحت متعلقہ صنعتیں موجود ہیں۔

شہر قومی و بین الاقوامی طویل الفاصلاتی ذرائع نقل و حمل کا مرکز ہے۔ شہر میں دو بین الاقوامی ہوائی اڈے قائم ہیں۔ بڑا ہوائی اڈا اتاترک بین الاقوامی ہوائی اڈا مرکز شہر سے 24 کلومیٹر دور واقع ہے۔ تعمیر کے وقت یہ شہر کے یورپی حصے کے ایک کونے میں تھا لیکن اب شہر کے اندر قائم ہے۔ جدید ہوائی اڈا صبیحہ گوکچن ہوائی اڈا ایشیائی علاقے سے 20 کلومیٹر مشرق جبکہ یورپی علاقے سے 45 کلومیٹر دور مشرق میں واقع ہے۔ سرکیجی اسٹیشن یورپی جانب تمام ٹرینوں کا آخری اسٹاپ ہے۔ شہر سے صرف ایک طویل الفاصلاتی ٹرین روزانہ چلتی ہے جو رومانیہ کے دار الحکومت بخارسٹ تک جاتی ہے۔ باسفورس کے پار حیدر پاشا اسٹیشن سے روزانہ انقرہ سمیت اناطولیہ کے دیگر شہروں کے لیے کئی ٹرینیں روانہ ہوتی ہیں۔ اب ان دونوں اسٹیشنوں کو فیری سروس کے ذریعے آپس میں جوڑدیا گیا ہے ۔

کانیون شاپنگ مال

ای 5، ای 90 اور ٹرانس یورپین موٹر وے یورپی سرحد سے ترکی اور مشرقی علاقوں کو جانے والے اہم ترین راستے ہیں۔ استنبول کے گرد موٹر وے کا جال انتہائی جدید ہے اور اسے مزید توسیع دی جا رہی ہے۔ موٹر ویز دار الحکومت انقرہ کے علاوہ ادرنہ کی جانب بھی جاتی ہے۔ شہر کے گرد دو ایکسپریس ویز ہیں۔ پرانے ایکسپریس وے کو ای 5 کہا جاتا ہے کو زیادہ تر شہر کا اندرونی ٹریفک استعمال کرتا ہے جبکہ جدید ٹرانس یورپین موٹر وے بین البراعظمی یا بین البلادی ٹریفک استعمال کرتا ہے۔ باسفورس پل اور فاتح سلطان محمد پل آبنائے باسفورس پر انہی دو ہائی ویز پر بنے ہوئے ہیں۔

استنبول کی بندرگاہ ملک میں سب سے زیادہ اہم ہے۔ شاخ زریں میں واقع قدیم بندرگاہ ذاتی جہاز رانی کے لیے استعمال ہوتی ہے۔ یہاں سے بحیرہ روم میں یونانی جزائر اور کرویئشا، وینس اور ناپولی،اٹلی، مارسے، فرانس اور حیفہ، اسرائیل اور بحیرہ اسود میں یوکرین تک کے لیے بحری جہاز روانہ ہوتے ہیں۔

شہر کے معروف پل

باسفورس پل، پس منظر میں فاتح سلطان محمد پل بھی واضح ہے

• باسفورس پل
• فاتح سلطان محمد پل
• غلطہ پل

اتاترک اولمپک اسٹیڈیم

اتاترک اولمپک اسٹیڈیم ترکی کا سب سے بڑا اسٹیڈیم ہے جس میں 82 ہزار 300 تماشائیوں کی گنجائش ہے۔ اسٹیڈیم نے 2005ء کی یورپین چیمپیئنز لیگ فائنل کی میزبانی کی تھی۔

شکرو سرج اوغلو اسٹیڈیم 52 ہزار 500 تماشائیوں کی گنجائش رکھتا ہے اور 2009ء میں UEFA کپ کے فائنل کی میزبانی کرے گا۔

استنبول کئی فٹ بال ٹیموں کا شہر ہے جن میں ترکی کی سب سے قدیم کھیلوں کی تنظیم بیشکطاش بھی شامل ہے۔ علاوہ ازیں غلطہ سرائے اور فنر باغچہ مشہور ترین ٹیمیں ہیں۔

شکرو سرج اوغلو اسٹیڈیم

استنبول فارمولا ون ترکش گراں پری، موٹر جی پی گراں پری، ایف آئی اے ورلڈ ٹورنگ کار چیمپیئن شپ،جی پی 2 اور لی مینز سیریز 1000 کلومیٹر ریس کی میزبانی کرتا رہتا ہے۔ یہ تمام کھیلوں کے مقابلے استنبول پارک میں منعقد ہوتے ہیں۔

دیگر کھیلوں میں باسکٹ بال، والی بال، گالف، شوٹنگ، گھڑ سواری اور ٹینس بے حد معروف ہیں۔

استنبول کے 45 جڑواں شہر ہیں :

• الماتے ، قازقستان {{{2}}}
• عمان ، اردن {{{2}}}
• باکو ، آذربائیجان {{{2}}}
• بارسلونا ، اسپین {{{2}}}
• برلن ، جرمنی {{{2}}}
• بڈاپسٹ ، ہنگری {{{2}}}
• بیونس آئرس ، ارجنٹائن {{{2}}}
• بوسان ، جنوبی کوریا {{{2}}}
• قاہرہ ، مصر {{{2}}}
• چٹاگانگ ، بنگلہ دیش {{{2}}}
• کولون ، جرمنی {{{2}}}
• کونسٹینٹا ، رومانیہ {{{2}}}
• دبئی ، متحدہ عرب امارات {{{2}}}
• ڈوریس ، البانیہ {{{2}}}
• فلورنس ، اطالیہ {{{2}}}
• ہوانا ، کیوبا {{{2}}}
• ہیوسٹن ، امریکا {{{2}}}
• جکارتہ ، انڈونیشیا {{{2}}}
• جدہ ، سعودی عرب {{{2}}}
• جوہور باہرو ، ملائشیا {{{2}}}
• کابل ، افغانستان {{{2}}}
• قازان ، روس {{{2}}}
• خرطوم ، سوڈان {{{2}}}
• کراچی ، پاکستان {{{2}}}
• ماری ، ترکمانستان {{{2}}}
• اوڈیسا ، یوکرین {{{2}}}
• اوش ، کرغزستان {{{2}}}
• پلووڈیف ، بلغاریہ {{{2}}}
• پراگ ، چیک جمہوریہ {{{2}}}
• رباط ، مراکش {{{2}}}
• ریو ڈی جینیرو ، برازیل {{{2}}}
• سرائیوو ، بوسنیا و ہرزیگووینا {{{2}}}
• سمرقند ، ازبکستان {{{2}}}
• شنگھائی ، چین {{{2}}}
• شیمونوسیکی ، جاپان {{{2}}}
• اسکوپے ، مقدونیہ {{{2}}}
• سینٹ پیٹرز برگ ، روس {{{2}}}
• اسٹاک ہوم ، سویڈن {{{2}}}
• اسٹراس بورگ ، فرانس {{{2}}}
• طفلس ، جارجیا {{{2}}}
• وینس ، اطالیہ {{{2}}}
• وارسا ، پولینڈ {{{2}}}
• سیان ، چین {{{2}}}
• کراکس ، وینیزویلا {{{2}}}

قسطنطنیہ

ترکی

استنبول ٹریول گائیڈ از ویکی ٹریول

استنبول کے بارے میں مضمون،انگریزی زبان میں

استنبول کا نقشہ

استنبول کی تاریخی تصاویر

استنبول کی تاریخ

ویکی کومنز پر استنبول سے متعلق سمعی و بصری مواد ملاحظہ کریں۔

1. archINFORM location ID: https://www.archinform.net/ort/1767.htm — اخذ شدہ بتاریخ: 6 اگست 2018
2.  "صفحہ استنبول في GeoNames ID"۔ GeoNames ID۔ اخذ شدہ بتاریخ 29 نومبر 2019۔
3.   "صفحہ استنبول في ميوزك برينز."۔ MusicBrainz area ID۔ اخذ شدہ بتاریخ 29 نومبر 2019۔
4.   "صفحہ استنبول في خريطة الشارع المفتوحة"۔ OpenStreetMap۔ اخذ شدہ بتاریخ 29 نومبر 2019۔
5. http://istanbul.yerelnet.org.tr/
6. https://www.plovdiv.bg/en/about-plovdiv/побратимени-градове/