ஆர்சனிக் ஐந்தாக்சைடு

ஆர்சனிக் ஐந்தாக்சைடு (Arsenic pentoxide) என்பது As2O5. என்ற மூலக்கூற்று வாய்ப்பாடு கொண்ட வேதிச் சேர்மம் ஆகும். இது ஆர்சனிக்(V) ஆக்சைடு என்றும் அழைக்கப்படுகிறது. ஆர்சனிக் மற்றும் ஆக்சைடு அயனிகளால் ஆன இச்சேர்மத்தில் ஆர்சனிக் +5 என்ற ஆக்சிசனேற்ற நிலையில் காணப்படுகிறது. ஆர்சனிக் +3 என்ற ஆக்சிசனேற்ற நிலையில் காணப்படும் ஆர்சனிக் மூவாக்சைடு அல்லது ஆர்சனிக்(III) ஆக்சைடு சேர்மமே மிகப்பரவலாகக் காணப்படுகிறது. எலிகளில் ஆர்சனிக் ஐந்தாக்சைடின் உயிர்கொல்லும் அளவு ( LD50 ) 8 மி.கி/கி.கி ஆகும்.[1] இச்சேர்மம் தண்ணீருடன் தொடர்பு கொண்டால் ஆர்சனிக் அமிலமாக மாறுகிறது. இவ்வமிலம் உலோகங்களை அரிக்கும் தன்மை கொண்டது ஆகும்.

ஆர்சனிக் ஐந்தாக்சைடின் முப்பரிமாணப் படம்

பண்புகள்

வெண்மை நிறத்துடன் நெடியற்று ஆர்சனிக் ஐந்தாக்சைடு காணப்படுகிறது. எளிமையாகத் தண்ணீரில் கரைந்து ஆர்சனிக் அமிலத்தை உருவாக்குகிறது.[1] அனைத்து ஆர்சனிக் சேர்மங்கள் போலவே ஆர்சனிக் ஐந்தாக்சைடும் அதிக நச்சுத்தன்மையுடன் காணப்படுகிறது[1][2][3]. வலிமையான ஆக்சிசனேற்றியான இச்சேர்மம் ஐதரோகுளோரிக் அமிலத்துடன் வினைபுரிந்து குளோரின் வாயுவைக் கொடுக்கிறது. 300° செ வெப்பநிலைக்கு ஆர்சனிக் ஐந்தாக்சைடை சூடுபடுத்தினால் இது ஆர்சனிக் மூவாக்சைடு மற்றும் ஆக்சிசனாக உடைகிறது.[4]

இது காரங்களுடன் வினைபுரிந்து ஆர்சனேட்டுகளை உருவாக்குகிறது. இவ்வினைக்குத் தேவையான ஆற்றல் சூடுபடுத்தலின் போது எடுத்துக்கொள்ளப்படுகிறது.

தயாரிப்பு

ஆர்சனிக் ஐந்தாக்சைடை, ஆர்சனிக்கை எரிய வைத்து தயாரிக்க இயலாது. அவ்வாறு எரியும் பொழுது ஆர்சனிக் மூவாக்சைடு சேர்மமே உருவாகிறது. எனவே [[ஆர்செனிக் அமிலம்|ஆர்செனிக் அமிலத்தை நீர் நீக்கம் செய்து இதைத் தயாரிக்கலாம். நீர் நீக்கத்தை பாசுபரசு ஐந்தாக்சைடு சேர்மத்தைக் கொண்டு நிறைவேற்றலாம்.

ஆர்சனிக் ஐந்தாக்சைடு வெண் துகளாக விடுவிக்கப்படுகிறது.[5]

பயன்கள்

ஆர்சனிக் ஐந்தாக்சைடு தீங்குயிர்கொல்லிகள் மற்றும் பூச்சிக்கொல்லிகளாக பயன்படுத்தப்படுகிறது. மேலும் இது கண்ணாடித் தொழில் துறையிலும் பயன்படுத்தப்படுகிறது.[6]

மேற்கோள்கள்
  1. "ARSENIC PENTOXIDE". chemicalland21.com (2012 [last update]). பார்த்த நாள் 6 August 2012.
  2. "Toxicity of Arsenic Compounds". ncbi.nlm.nih.gov (2012 [last update]). பார்த்த நாள் 6 August 2012.
  3. "ARSENIC Toxicity". manbir-online.com (2012 [last update]). பார்த்த நாள் 6 August 2012.
  4. Wiberg, Nils; Arnold Holleman (2007). Lehrbuch der Anorganischen Chemie. Berlin, New York: de Gruyter. பக். 845. பன்னாட்டுத் தரப்புத்தக எண்:978-3-11-017770-1.
  5. Wiberg, Nils; Arnold Holleman (2007). Lehrbuch der Anorganischen Chemie. Berlin, New York: de Gruyter. பக். 844. பன்னாட்டுத் தரப்புத்தக எண்:978-3-11-017770-1.
  6. "Arsenic pentoxide Manufacturers Suppliers in China CAS No 1303-28-2 | Xilan Chemicals Co Ltd Leading Chemical Manufacturer and Trader". xilanchem.com (2012 [last update]). பார்த்த நாள் 6 August 2012.

இவற்றையும் காண்க
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.