احمد شاہ ابدالی

بوقت عمر 45 سال احمد شاہ کا حلیہ یوں تھا ، قد لمبا، بدن دہر ماٸل فربہی، چہرہ حیرت انگیز حد تک چوڑا، داڑھی بہت کالی بحیثیت مجموعی اس کی ہیٸت نہایت پروقار اور اندرونی طاقت کی مظہر تھی۔ وہ ایک مقناطیسی شخصیت کا انسان تھا اس کے روشن اور متبسم چہرے میں ایسی خوبی تھی جو دیکھنے والے کا دل موہ لیتی تھی۔

احمد شاہ درانی رحمدل انسان تھا اس کی طبیعت میں خوش مزاجی تھی دربار میں اور سرکاری مواقعوں پر نہایت وقار سے رہتا لیکن ذاتی زندگی میں دوستانہ طریقے سے پیش آتا اپنے اہل قبیلہ سے دوستانہ تعلقات رکھتا تھا۔

احمد شاہ درانی ان تمام عیوب سے مبرا تھا جو عموماً مشرقی اقوام کے لوگوں میں پائے جاتے ہیں مثلاً شراب یا افیون کی بدمستی، لالچ، ظلم، تعلقات میں دوغلاپن وغیرہ۔ وہ مذہب کا بڑا حامی تھا اپنی رحمدلی اور فیاضی کی بدولت رعایا کے ہر طبقے میں بے حد مقبول تھا۔

احمد شاہ وعدے کا بڑا پکا تھا نادر شاہ نے احمد شاہ سے وعدہ لیا تھا کہ ”جب تم بادشاہ بنو تو تمہارا یہ فرض ہے کہ میری اولاد کے ساتھ زیادہ لطف و مہربانی سے پیش آؤ“ احمد شاہ نے اس وعدے پر پورا پورا عمل کیا اور نادر شاہ کے بیٹوں کی مسلسل احسان فراموشی اور کینہ پروری کے باوجود ان سے اچھا سلوک کیا۔

احمد شاہ سخت مذہبی مزاج کا حامل تھا اسے اولیاء و علما کرام کی صحبت بہت پسند تھی وہ درویشوں اور علما کی بڑی عزت کرتا تھا حضرت صابر شاہ ولیؒ سے اسے گہری عقیدت تھی اس نے بے شمار اولیاء کرام کے مزارات کی زیارت کی ہر جمعرات کو علما و فقراء کو کھانے پر بلاتا ان سے مذہب اور دیگر علوم پر گفتگو کرتا اس کے دربار میں سلطنت کے اعلٰی عہدے دار اور امرا ادب سے کھڑے رہتے لیکن سیدوں اور علماء کو کرسی ملتی تھی۔

اس کی زندگی کی سب سے بڑی خواہش تھی کہ اسے ولی کا مرتبہ حاصل ہو، اکثر موقعوں پر اس نے رب کے حضور التجاء کی جو مقبول ہوٸی۔

احمد شاہ کو شہ سواری اور شکار کا بڑا شوق تھا وہ اپنے گھوڑوں کا بڑا شیداٸی تھا جب اس کا پسندیدہ گھوڑا تارلان بیمار ہوا تو احمد شاہ بہت غمگین ہوا۔

احمد شاہ سادہ زندگی گزارتا تھا، اس کا لباس بہت ہی سادہ ہوتا تھا حتی کہ امرا اور اس میں فرق محسوس نہیں ہوتا تھا، اس کے سر پر ایک شال دستار کے طور پر بندھی ہوتی تھی، جسم پر سوتی کپڑے کی قمیض اس کے اوپر رنگدار واسکٹ اس کے اوپر چمڑے کا لمبا کوٹ ہوتا تھا، شلوار ڈھیلی ڈھالی ہوتی تھی۔

احمد شاہ کی خوراک بھی سادہ تھی، زیادہ لذیذ کھانوں کا شوقین نہیں تھا، چاول اور مصالحہ دار گوشت کا پلاؤ کھانے کا شوقین تھا، جس میں کبھی کبھی رنگدار پیاز اور انڈے ملے ہوئے ہوتے، گوشت کباب، بھنا ہوا گوشت، پنیر، مکھن، دودھ، سالن، پھل اور شربت بھی پسند کرتا تھا۔

احمد شاہ کے باقاعدہ کسی مکتب سے تعلیم یافتہ ہونے کا دستاویزی ثبوت نہیں ملتا، لیکن یہ حقیقت ہے کہ وہ پڑھا لکھا تھا کیونکہ اسے تمام ملکی زبانوں پر عبور حاصل تھا، احمد شاہ ایک شاعر بھی تھا اس کی شاعری میں سادہ پن اور واٸیت طرز پایا جاتا ہے۔

احمد شاہ نے زیادہ تر زندگی جنگی مہمات میں بسر کی، اسے اتنی فرصت ہی نہ مل سکی کہ وہ دیگر امور کی طرف توجہ دے لیکن اس کے باوجود اس نے علم دوستی کا ثبوت دیا، خود شاعر اور تعلیم یافتہ تھا اس لٸے اس نے شاعروں اور ادیبوں کی سرپرستی کی، احمد شاہ بٹالے کے شاعر واقف، سیالکوٹ کے شاعر نظام الدین عشرت اور مرزا مہدی استر آبادی کا بڑا مداح تھا، نظام الدین نے ” شاہ نامہ احمدیہ “ کے نام سے مثنوی لکھی جس میں احمد شاہ کے حالات وفات تک اور تیمور شاہ درانی کی تخت نشینی کے حالات دلچسپ انداز میں منظم کٸے۔

احمد شاہ تعمیرات کا بھی شوقین تھا پانی پت کی فتح کے بعد اس نے قندھار احمد شاہی کے نام سے ایک شہر کی بنیاد رکھی، اس شہر میں دو عمارات سب سے خوبصورت تھیں ایک وہ یادگار عمارت تھی جس میں رسول اللہ ﷺ کا خرقہ مبارک لوگوں کی زیارت کے لٸے رکھا گیا تھا، دوسری عمارت احمد شاہ کا مقبرہ تھی۔ 1753ء میں کابل شہر کے ارد گرد شہر پناہ تعمیر کراٸی۔ 1769ء میں اس نے شاہ اسحٰق المعروف شاہ شہید کا مزار قلعہ بالاحصار کے نزدیک بنوایا۔ 1756-57 میں احمد شاہ نے مکہ میں افغان زاٸرین کے لٸے قیام گاہ بنواٸی۔ مزار شریف کے قریب تاشقر خان کا قصبہ احمد شاہ نے تعمیر کروایا تھا۔ احمد شاہ معماروں اور کاریگروں خصوصاً لکڑی کا کام کرنے والوں کی سرپرستی کرتا تھا۔

افغانستان میں مسلمانوں کی اکثریت تھی لیکن دیہات میں ہندو اور سکھ بھی آباد تھے مگر ان کی تعداد کم تھی شہروں میں ہندوؤں اور سکھوں کی اچھی خاصی تعداد آباد تھی۔ جارج فوسٹر نے 1783 میں افغانستان میں سفر کے دوران جو دیکھا اس کے متعلق وہ لکھتا ہے ہندو تاجروں کی دکانوں کی تعداد اور ان کے آسودہ حال چہروں کو دیکھ کر معلوم ہوتا ہے کہ قندہار میں انہیں بڑی آزادی اور تحفظ حاصل ہے۔ جارج فوسٹر کا یہ بیان احمد شاہ کی مذہبی رواداری کا بہت بڑا ثبوت ہے۔

یوں تو احمد شاہ کی زیادہ تر زندگی جنگی مہمات میں گزری لیکن پھر بھی اس نے اہم معاشرتی اصلاحات کی۔ اس نے عورتوں کے مرتبے کو بلند کیا، طلاق پر پابندی لگاٸی، بیوہ عورتوں کی دوبارہ شادی کی پرزور تحریک شروع کی، اس نے حکم دیا کہ کسی شخص کے مرنے کے بعد اس کی بیوہ کسی نزدیک رشتے دار سوائے باپ، بیٹے یا بھاٸی سے شادی کرے اور اگر نزدیکی رشتہ دار موجود نہ ہو تو بیوہ اپنے شوہر کے گھر رہے گی اور پوری زندگی اس کی جاٸیداد سے گزارہ کرے گی۔

باقاعدہ فوج ساری فوج کا ایک حصہ تھی، اس کے تین حصے تھے: (ا) پیادہ (ب) سوار (ج) توپ خانہ غیر منظم فوج زیادہ تر سواروں پر مشتمل ہوتی تھی، اس میں پیادہ سپاہی بہت کم ہوتے تھے۔

فوجی دفتر کو دفترِ نظام کہتے تھے اس کے کٸی شعبے تھے اسلحہ سازی، بارود، کپڑوں اور خوراک کی فراہمی، تنخواہوں کی آداٸیگی اور حسابات کا رکھنا دفترِ نظام کے ذمے تھا، سپہ سالار کے ماتحت کٸی افسر کام کرتے تھے جو مختلف شعبوں کی نگرانی کرتے تھے۔

اردو باش (لشکر کا سردار) امیر لشکر (جنرل) دہ باشی (10 سپاہیوں کا افسر) شاہنکچی باشی (افواجِ خاصہ کا کماندار) قلعہ اتاسی (فوج کا کماندار) یوز پاشی (100 سپاہیوں کا افسر)

ذراٸع نقل و حمل کے لٸے گھوڑوں، خچروں، اونٹوں، بیلوں اور ہاتھیوں کو استعمال کیا جاتا تھا۔

اس بات کا تاریخی ثبوت نہیں کہ سپاہیوں او افسروں کو کیا تنخواہ دی جاتی تھی، ایک واقعہ سے معلوم ہوتا ہے کہ سوار کو 12 روپے ماہوار اور پیادہ کو 6 روپے ماہوار ملتے تھے، شاہ سپاہیوں کو تنخواہ دیتے وقت موجود ہوتا بعض اوقات انہیں اپنے ہاتھ سے تنخواہ دیتا تھا۔ منظم فوج میں بھرتی رضاکارانہ طور پر ہوتی تھی، اسے باقاعدہ تنخواہ ملتی تھی جو جنس اور نقد کی صورت میں ہوتی تھی۔ اسلحہ،گھوڑا اور دیگر اشیاء حکومت کی طرف سے دی جاتی تھیں۔ گھوڑے کی قیمت معمولی قسطوں میں لی جاتی تھی، گھوڑے کی خوراک وغیرہ کا انتظام اسے خود کرنا پڑھتا تھا، اسے زمانہ جنگ کے سوا 3 ماہ کی رخصت ملتی تھی، باقاعدہ فوج کا زیادہ تر حصہ دار السلطنت رہتا، تھوڑا سا حصہ صوبوں اور صوباٸی کے شہروں میں مقرر کیا جاتا تھا۔

بے قاعدہ فوج کا زیادہتر حصہ سواروں پر مشتمل ہوتا، پیادہ بہت کم ہوتے تھے۔ یہ ساری فوج کا 2 تہاٸی تھی، مختلف قباٸل کے افراد اس میں شامل ہوتے اس فوج کا تین چوتھاٸی حصہ سرداروں پر مشتمل ہوتا۔

احمد شاہ کا توپ خانہ بہت اچھا تھا گھوڑے باری توپیں کھینچتے، ہاتھی بھی توپیں اٹھاتے تھے جبکہ ہلکی توپیں ایک یا دو اونٹ کھینچتے۔ توپ خانے کا اعلٰی افسر توپچی باشی کہلاتا تھا۔ اس عہدے پر رحمان خان بارک زٸی فاٸز تھا۔