بھنگڑا (رقص)

روایتی بھنگڑا رقص ضلع سیالکوٹ میں معیاری سمجھا جاتا ہے۔[5] تاہم جن ضلعوں کے بھنگڑا ناچ معروف ہیں وہ پاکستان میں واقع ہیں جبکہ بھنگڑا کی اجتماعی شکل بھارتی پنجاب کے ضلع گرداسپور میں رائج رہی ہے جہاں ہوشیارپور کے باشندے ناچا کرتے تھے۔[2]

چونکہ بھنگڑا ایک موسمی رقص ہے لہذا اہل پنجاب عموماً بیساکھی کے تہوار والے مہینے میں بھنگڑا رقص کرتے ہیں۔ روایتی بھنگڑا ناچنے والے عموماً دائرہ بنا کر ناچتے[6] اور اس کے روایتی انداز و اطوار کو بخوبی نبھاتے ہیں۔ بیساکھی کے علاوہ دیگر موقعوں پر بھی یہ رقص رائج[7] اور پاکستان میں خاصا مقبول ہے۔[8]

سنہ 1990ء سے جدید بھنگڑا کا آغاز ہوا جسے مغربی ممالک میں آباد پنجابیوں نے بعض مغربی رقص کے انداز اور شکلوں کو ملا کر ایجاد کیا ہے۔ 1990ء کی دہائی سے امریکا، کینیڈا اور انگلینڈ کے شہروں جدید بھنگڑا کے سالانہ مسابقے منعقد ہوتے ہیں۔ ان مسابقوں میں پنجابی جوان، جنوبی ایشیا کے باشندے اور اور دیگر افراد اعزاز اور پیسے کمانے کے لیے شریک ہوتے ہیں۔