தஞ்சாவூர் ஜனார்த்தனப் பெருமாள் கோயில்

தஞ்சாவூர் அரண்மனை தேவஸ்தானத்திற்கு உட்பட்ட 88 கோயில்களில் இக்கோயிலும் ஒன்றாகும்.[1]

இக்கோயிலின் மூலவராக ஸ்ரீதேவி பூதேவியுடன் வாசுதேவப்பெருமாள் (ஜனார்த்தனப்பெருமாள்) உள்ளார். இறைவி கமலவல்லித்தாயார் ஆவார்.

ராஜகோபுரத்தைக் கடந்து உள்ளே செல்லும்போது பலிபீடம் உள்ளது. அடுத்து கருடாழ்வார் உள்ளார். இரு துவாரபாலகர்கள் இரு புறமும் உள்ளனர். அடுத்த மண்டபத்தில் கருவறை முன்பாக இரு துவாரபாலகர்கள் இரு புறமும் உள்ளனர். மூலவர் கருவறையை ஒட்டி தாயார் சன்னதி உள்ளது.

நவநீத சேவையின்போது தஞ்சாவூரிலுள்ள நீலமேகப்பெருமாள், நரசிம்மப்பெருமாள், மணிக்குன்னப்பெருமாள், கல்யாண வெங்கடேசப்பெருமாள், மேலராஜவீதி நவநீதகிருஷ்ணன், எல்லையம்மன் தெரு ஜனார்த்தன பெருமாள், கரந்தை யாதவ கண்ணன் கோயில், கீழராஜவீதி வரதராஜபெருமாள், தெற்கு வீதி கலியுக வெங்கடேச பெருமாள், பள்ளியக்ரகாரம் கோதண்டராமபெருமாள், மானம்புச்சாவடி நவநீதகிருஷ்ணன், பிரசன்ன வெங்கடேசபெருமாள், மேலஅலங்கம் ரெங்கநாதபெருமாள், படித்துறை வெங்கடேசபெருமாள், கோட்டை பிரசன்ன வெங்கடேச பெருமாள் ஆகிய 15 கோயில்களைச் சேர்ந்த பெருமாள்கள் கலந்துகொள்கின்றனர். [2] அந்த கோயில்களில் இந்த கோயிலும் ஒன்றாகும்.

திருச்சுற்றில் அனுமார் சன்னதியாக தட்சிண சஞ்சீவி ஆஞ்சநேயர் கோயில் என்றழைக்கப்படுகின்ற சிறிய கோயில் உள்ளது. இக்கோயிலும் தஞ்சாவூர் அரண்மனை தேவஸ்தானத்திற்கு உட்பட்ட 88 கோயில்களில் ஒன்றாகும்.[1]

இந்த இரு கோயில்களுக்கும் 15.12.2006 அன்று குடமுழுக்கு நடைபெற்றதற்கான தனித்தனியாக இரு கல்வெட்டுகள் கோயிலின் மண்டபத்தில் காணப்படுகின்றன. இக்கல்வெட்டுகள் சுவற்றில் பதிக்கப்படாமல் தனியாக வைக்கப்பட்டுள்ளன.