രതിസലിലം
സ്ത്രീകളിൽ മാനസികവും ശാരീരികവുമായ ലൈംഗിക ഉത്തേജനം ഉണ്ടാകുന്നതിന്റെ ഒരു പ്രധാന ലക്ഷണമാണ് "രതിസലിലം അഥവാ ലൂബ്രിക്കേഷൻ (Vaginal lubrication)". മത്തിഷ്ക്കത്തിലെ ഉത്തേജനത്തിന്റെ ഫലമായി യോനീകലകളിൽ രക്തം നിറഞ്ഞ് അതിന്റെ ആഴവും പരപ്പും വർദ്ധിക്കുന്നു. അപ്പോൾ യോനിമുഖത്തിനടുത്തുള്ള 'ബർത്തൊലിൻ ഗ്രന്ഥികൾ, യോനീകലകൾ തുടങ്ങിയവ നനവ്/ വഴുവഴുപ്പുള്ള സ്രവം പുറപ്പെടുവിക്കുന്നു. ഇതിനെയാണ് 'രതിസലിലം, രതിജലം, മദനജലം' എന്നൊക്കെ വിളിക്കുന്നത്. സ്ത്രീകളുടെ ലൈംഗിക ആസ്വാദനത്തിൽ ഇത് പ്രധാനപങ്ക് വഹിക്കുന്നു. ലിംഗപ്രവേശനം എളുപ്പമാക്കുക, സംഭോഗം സുഖകരമാക്കുക, രതിമൂർച്ഛക്ക് (Orgasm) സഹായിക്കുക എന്നിവയാണ് ഇതിന്റെ ധർമ്മം. ലൂബ്രിക്കേഷന്റെ അഭാവത്തിൽ ലൈംഗികബന്ധം വേദനയുള്ളതും വിരസവും ആകാനും, പുരുഷന് ആയാസകരമാകാനും സാധ്യതയുണ്ട്. ഇത് ലൈംഗികബന്ധത്തോട് ഭയവും താല്പര്യക്കുറവും ഉണ്ടാകാൻ കാരണമാകാം. സംഭോഗത്തിന് മുൻപ് പങ്കാളികൾ ആവശ്യത്തിന് സമയം ആമുഖലീലകൾക്ക്‌ (ഫോർപ്ലേ) ചിലവഴിച്ചെങ്കിൽ മാത്രമേ പലപ്പോഴും ശരിയായ ലൂബ്രിക്കേഷൻ ഉണ്ടാവുകയുള്ളൂ.
പുരുഷന്മാരിലും ചെറിയ അളവിൽ മദനജലം (Precum) ഉണ്ടാകാറുണ്ട്. യോനിയിലെ പിഎച്ച് ക്രമീകരിക്കുക തുടങ്ങിയ ധർമങ്ങളും ഇതിനുണ്ട്. ഇതിൽ ബീജത്തിന്റെ സാന്നിധ്യവും കാണപ്പെടുന്നു. ആയതിനാൽ ഇത് ഗർഭധാരണത്തിനും കാരണമാകാറുണ്ട്.
സാധാരണയായി രതിജലത്തിന് പുളിരസമാണുള്ളത്. ഇതിന്റെ നിറം അല്പം വെളുപ്പു കലര്ന്നത് മുതൽ നിറമില്ലാത്തത് വരെ ആകാം, അത് സ്ത്രീകളുടെ ആർത്തവ ചക്രത്തിനനുസരിച്ച് മാറിക്കൊണ്ടിരിക്കും. [1]
രതിജലവും യോനീവരൾച്ചയും
ആർത്തവ വിരാമത്തിന് (Menopause) ശേഷം സ്ത്രീ ഹോർമോണിന്റെ കുറവ് മൂലം രതിജലത്തിന്റെ ഉത്‌പാദനം കുറഞ്ഞേക്കാം. ഇതിനെ യോനീ വരൾച്ച (Vaginal dryness) എന്നറിയപ്പെടുന്നു. യോനിയിൽ അണുബാധ തുടങ്ങിയ കാരണങ്ങൾ കൊണ്ട് യുവതികളിലും ഇത് സംഭവിക്കാം. കൂടുതൽ സമയം സന്തോഷകരമായ രതിപൂർവ്വലീലകളിൽ (Foreplay) ഏർപ്പെടുക എന്നതാണ് രതിജലം ഉത്പാദിപ്പിക്കപ്പെടാൻ സ്വാഭാവികമായ മാർഗം. ഏതെങ്കിലും ഗുണമേന്മയുള്ള ലൂബ്രിക്കന്റ് ജെല്ലിയും യോനിനാളത്തിൽ പുരട്ടാവുന്നതാണ്. ഹോർമോൺ ക്രീം ഉപയോഗിക്കുന്നത് ഏറെ ഫലപ്രദമാണ്. ആവശ്യത്തിന് ശുദ്ധജലം കുടിക്കുന്നത് യോനീ വരൾച്ചയുടെ തോത് കുറക്കുന്നു. സ്ത്രീരോഗങ്ങൾ ഉള്ളവർ അതിന് ചികിത്സ എടുക്കേണ്ടതുണ്ട്. ബാഹ്യകേളിയുടെ കുറവ്, മാനസിക- കുടുംബപ്രശ്നങ്ങൾ, പ്രസവം, നിർബന്ധിച്ചുള്ള ലൈംഗികബന്ധം, പങ്കാളിയോടുള്ള താല്പര്യക്കുറവ്, ലൈംഗികതയോടുള്ള വെറുപ്പ്, പ്രായമായി എന്ന തോന്നൽ, പാപചിന്ത, യോനീസങ്കോചം (Vaginismus), പ്രമേഹം, അണുബാധ, ഗർഭപാത്രം/ഓവറി നീക്കം ചെയ്യൽ, സ്ത്രീരോഗങ്ങൾ, നിർജലീകരണം, സ്ട്രെസ് തുടങ്ങിയവ ലൂബ്രിക്കേഷനെ മോശമായി ബാധിച്ചേക്കാം. രതിജലത്തിന്റെ അഭാവത്തിൽ ലൈംഗിക ബന്ധത്തിലേർപ്പെടുമ്പോൾ ജനനേന്ദ്രിയങ്ങളിൽ ഉണ്ടാകുന്ന പോറലുകളിലൂടെ എയ്ഡ്‌സ് മുതലായ സുരക്ഷിതമല്ലാത്ത ലൈംഗിക ബന്ധത്തിലൂടെ പകരുന്ന രോഗങ്ങളും (STDs) പെട്ടെന്ന് പിടിപെടാൻ സാധ്യതയുണ്ട്. [2]
യോനിയിൽ ഉണ്ടാകുന്ന മറ്റ് സ്രവങ്ങളിൽ നിന്നും രതിജലം തികച്ചും വ്യത്യസ്തമാണ്. ആർത്തവ ചക്രത്തിലെ അണ്ഡ വിസർജനകാലത്തും (Ovulation) മ്യൂക്കസ്/ യോനീസ്രവം ഉണ്ടാകാറുണ്ട്.
കൃത്രിമ ലൂബ്രിക്കന്റുകൾ
രതിജലം ഉണ്ടാകാത്ത അവസ്ഥയിൽ ഉപയോഗിക്കുന്നതാണ് കൃത്രിമ ലൂബ്രിക്കന്റ് ജെല്ലികൾ (Lubricant gels). യോനീവരൾച്ച മൂലം സംഭോഗ സമയത്ത് വേദന അനുഭവപ്പെടുന്നവർക്ക് വേണ്ടിയുള്ളതാണിത്. ഇവ പല തരത്തിലുണ്ട്. എണ്ണ അടങ്ങിയതും (Oil based), ജലം അടങ്ങിയതും (Water based), സിലിക്കൺ അടങ്ങിയതും അവയിൽ ചിലതാണ്. ലൈംഗിക ബന്ധത്തിന് മുൻപായി ഇവ യോനീനാളത്തിൽ പുരട്ടാവുന്നതാണ്. ഫാർമസിയിൽ ലഭ്യമായ കേവൈ ജെല്ലി തുടങ്ങിയവ ഇതിനു ഉദാഹരണമാണ്‌. കൃത്രിമ ലൂബ്രിക്കേഷന് വേണ്ടി വൃത്തിഹീനമായ എണ്ണകൾ (Oils) ഉപയോഗിക്കുന്നത് അണുബാധക്ക് (infection)കാരണമാകാം. ഇത് പ്രശ്നം കൂടുതൽ സങ്കീർണ്ണമാക്കാം. എണ്ണ അടങ്ങിയ ലൂബ്രിക്കന്റുകളുടെ (Oil based lubricants) കൂടെ ഉപയോഗിച്ചാൽ ലാറ്റക്സ് കോണ്ടം പൊട്ടിപ്പോകാൻ സാധ്യതയുണ്ട്. ലൂബ്രിക്കന്റുകൾ ഫലപ്രദമാകാത്തവർക്ക് സ്ത്രൈണ ഹോർമോൺ അടങ്ങിയ ക്രീമുകൾ ലഭ്യമാണ്. [3]