محمد المتوکل علی اللہ ثالث

مرج دابق کے معرکے میںالاشرف قانصوہ غوری خلیفہ متوکل اور مذاہب اربعہ کے قاضیوں کو لے کر حلب گیا تھا۔ جنگ مرج دابق میں الاشرف قانصوہ غوری کے قتل کے بعد سلیم اول نے حلب کے مضافات کے باہر ہی خلیفہ متوکل کا اپنی فرودگاہ میں خیرمقدم کیا اور خلعت شاہانہ پیش کی۔ سلطان سلیم اول نے خلیفہ متوکل کو حلب میں اقامت اختیار کرنے کی اجازت دے دی لیکن جب سلیم اول دمشق کے لیے روانہ ہوا تو خلیفہ متوکل کو اپنے ہمراہ لیتا گیا۔[1]

• مزید پڑھیں:جنگ ریدانیہ، الاشرف طومان بائ ثانی

1516ء میں الاشرف قانصوہ غوری جنگ مرج دابق کے لیے جب مصر سے روانہ ہوا تھا تو اپنے برادر زادے الاشرف طومان بائ ثانی کو مصر میں اپنا نائب بنا کر گیا تھا۔ الاشرف قانصوہ غوری کی وفات کی خبر سنتے ہی الاشرف طومان بائ ثانی کی بحیثیتِ مملوکی سلطانِ مصر بیعت کرلی گئی۔ سلیم اول جو مصر کی فتح کے لیے بلاد الشام سے مصر پہنچ رہا تھا، 22 جنوری 1517ء کو جنگ ریدانیہ کے معرکے میں الاشرف طومان بائ ثانی شکست کھا گیا اور فرار ہوکر اسکندریہ بھاگتے ہوئے گرفتار کر لیا گیا۔ سلیم اول نے اُسے 10 دن اپنے پاس رکھا اور بطور قیدی 15 اپریل 1517ء کو اُسے پھانسی دے دی گئی اور مصر سے مملوکوں کی حکومت ختم ہو گئی۔ 22 جنوری 1517ء کو مصر پر سلیم اول کا قبضہ ہو گیا اور خلیفہ متوکل نے اُس کے حق میں خلافت سے دستبردار ظاہر کی اور رسول اللہ صلی اللہ علیہ وسلم کے تبرکات، علم، تلواریں، ردائے مبارک اور حرمین الشریفین کی کنجیاں سلطان سلیم اول کے حوالے کر دیں۔ سلطان سلیم اول اِس دستبرداری کے بعد خلیفہ کے خطاب سے بھی اور خادم الحرمین الشریفین کے لقب سے بھی سرفراز ہوا۔[2] خلیفہ متوکل بعد ازاں استنبول منتقل ہو گئے جہاں وہ سلطان سلیمان اول کے عہد حکومت میں مصری معاملات کے مشیر خاص بھی رہے۔