راجہ داہر حاکم سندھ نے مسلمانوں کے ساتھ خواہ مخواہ کی دشمنی شروع کر دی تھی۔ 22 ھ میں مسلمان مجاہد ایران فتح کرنے کے بعد مکران پر حملہ آور ہوئے تو سندھیوں نے ان کی بھرپور مخالفت کی۔ مسلمانوں نے سندھ اور مکران پر کے متحدہ لشکر کو شکست دی۔ لیکن اس وجہ سے مسلمانوں اور حکومت سندھ کے درمیان عناد کا بیج بویا گیا۔

باہمی دشمنی کی فضا کو راجا داہر نے برقرار رکھا اور جب مکران میں ایک سردار محمد علافی نے مکران کے گورنر کو قتل کرکے سندھ کی راہ لی تو راجا داہر نے اسے اپنے ہاں پناہ دی اور اپنی فوج میں اسے عہدہ بھی دیا۔

راجا داہر چونکہ متعصب ہندو اور برہمن زادہ تھا۔ اس لیے اس نے بدھ مت کے پیروکاروں پر بے پناہ مظالم ڈھائے۔ اور بزور شمشیر ان کو مٹانے کی پالیسی پر عمل کیا۔ مظلومین میں جاٹ اور لوبان قومیں بھی شامل تھیں۔ جن کو راجا داہر کے باپ چچ نے ذلیل و رسوا کرنے کے لیے ان پر پابندی لگا دی تھی کہ وہ اصلی کی بجائے مصنوعی تلوار اپنے پاس رکھیں۔ قیمتی کپڑے، ریشم مخمل اور شال استعمال نہ کریں۔ گھوڑے کی ننگی پیٹھ پر سواری کریں ننگے سر اور ننگے پیر رہیں اور گھر سے باہر نکلتے ہوئے اپنا کتا ساتھ رکھیں۔ راجا داہر نے بھی ان پابندیوں کو قائم رکھا۔ سندھ کے یہ مظلوم طبقے مسلمانوں سے مدد کے طالب تھے۔

سندھ قدیم زمانے میں ساسانی حکومت کا حصہ رہا۔ جو اب مسلمانوں کے قبضے میں آ چکی تھی۔ اس لیے مسلمان اسے اپنی حکومت کا ایک ٹوٹا ہوا حصہ قرار دیتے تھے۔

حجاج بن یوسف نے راجا داہر کے نامعقول رویہ کی وجہ سے 710 ء میں عبید اللہ کی قیادت میں ایک فوج بھیجی لیکن اسے شکست ہوئی۔ اگلے سال دوسری مہم بدیل کی سرکردگی میں بھیجی گئی لیکن اسے بھی راجا داہر کے بیٹے نے شکست دی۔ ان دونوں مہمات کی ناکامی کے بعد مسلم حکومت کے وقار کو بحال کرنے کے لیے سندھ کی فتح ناگزیر ہو گئی تھی۔ اس لیے حجاج بن یوسف نے خلیفہ ولید بن عبد الملک سے اس کی اجازت حاصل کی۔

محمد بن قاسم حجاج کا بھتیجا تھا بعض روایت کے مطابق چچیرا بھائی تھا۔ وہ اس وقت فارس کا گورنر تھا۔ سترہ سال کا کم عمر نوجوان ہونے کے باوجود انتہائی ہوشیار اور قابل جرنیل تھا۔ حجاج بن یوسف |حجاج]] نے اس کی نگرانی میں 12 ہزار فوج تیار کی اور سوئی دھاگہ سے لے کر منجنیق تک ضرورت کی ہر چیز کا سامان مہیا کیا۔ بھاری سامان ایک بحری بیڑے کے ذریعے روانہ کیا گیا۔ حجاج بن یوسف |حجاج]] نے گزشتہ مہمات سے سبق لیتے ہوئے بڑی احتیاط سے کام لیا۔ فوج کی اصل کمان اس کے اپنے ہاتھ میں تھے۔ اور محمد بن قاسم کو ہدایت کی گئی کہ وہ فوجی کارروائی کے دوران مرکز کی ہدایات پر عمل کرے۔

[[محمد بن قاسم]] مکران کے راستے سندھ کی طرف روانہ ہوا اور پنجگوار اور ارمن بیلہ کو فتح کرتا ہوا دیبل پہنچا۔ بحری راستے سے روانہ ہونے والی فوج یہیں اس سے آملی۔ دیبل کی بندر گاہ کراچی کے قریب تھی۔ اہل شہر قلعہ بند ہو کر بیٹھ رہے۔ کئی ماہ محاصرہ جاری رہا لیکن شہر فتح ہونے میں نہ آتا تھا۔ آخر کار حجاج بن یوسف کی ہدایت کے مطابق منجنیق کو ایک خاص زاویہ پر نصب کرکے شہر پر سنگباری شروع کی گئی اسی اثناء میں محمد بن قاسم کو معلوم ہوا کہ جب تک شہر کے وسط کا گنبد محفوظ ہے۔ شہر والوں کے حوصلے بلند رہیں گے۔ چنانچہ محمد بن قاسم نے خصوصی طور پر گنبد کو نشانہ بنایا۔ گنبد گرنے سے اہل شہر کے حوصلے پست ہو گئے اور راجا داہر کا حاکم شہر چھوڑ کر بھاگ گیا۔ محمد بن قاسم نے شہر پر قبضہ کرکے ایک مسجد تعمیر کروائی۔ اس نے دشمن کر مرعوب کرنے کے لیے تمام مخالف لشکر کو تہ تیض کر دیا۔ اور بدھ مت کے پجاریوں اور مسلمان قیدیوں کو ظالم ہندوؤں سے نجات دلائی۔ اس سے بدھ مت کے حامی کھلم کھلا مسلمانوں کی حمایت کرنے لگے۔

نیرون کی آبادی اور حاکم بدھ مت کا پیروکار تھے۔ وہ مسلمانوں سے خائف بھی تھی۔ اور انہیں اپنا نجات دہندہ بھی سمجھتے تھے۔ اس لیے محمد بن قاسم کے نیرون پہنچنے سے پہلے ہی نیرون کے حاکم نے حجاج سے امان نامہ منگوا لیا تھا۔ چنانچہ اسلامی لشکر کے پہنچنے پر اس نے امان ناہ پیش کیا۔ سالار لشکر کی خدمت میں تحائف پیش کیے اور سندھ کی تسخیر کے لیے قابل قدر مشور ے دیے۔ اسلامی لشکر کے لیے اس نے رسد کا بھی انتظام کیا۔ محمد بن قاسم نے بھی اس کی ہر طرح قدر افزائی کی۔ شہر میں ایک مسجد تعمیر کی گئی اور مسلمانوں کی کالونی بسائی گئی۔

نیرون کے بعد محمد بن قاسم سیوستان کی طرف بڑھا۔ نیرون کا بدھ راجا رہنمائی کے لیے ساتھ تھا۔ راستے میں بہرج کی بدھ آبادی نے اطاعت قبول کر لی۔ سیوستان پر راجا داہر کا بھتیجا بجہرا حکومت کرتا تھا۔ اگرچہ یہاں کے عوام مسلمانوں کی اطاعت کر لینے پر تیار تھے لیکن راجا مقابلہ کرنا چاہتا تھا۔ تاہم جب مقابلہ ہو ا تو شہر کی آبادی نے اس کاساتھ نہ دیا۔ اور وہ شہر چھوڑ کربھاگ گیا شہر پر مسلمانوں کا قبضہ ہو گیا۔

راجا بجہرا سیوستان سے بھاگ کر سیسم چلا گیا۔ جہاں کا راجا بدھ مت کا پیروکار تھا۔ اور مسلمانوں سے لڑنا نہ چاہتا تھا۔ اس نے مسلمانوں کی خدمت میں حاضر ہو کر اطاعت قبول کر لی۔ محمد بن قاسم نے اس کی بہت عزت افزائی کی۔ جس سے اہل سندھ بہت متاثر ہوئے۔ اور کاکاکو اس کی ریاست کا انتظام دوبارہ سونپ دیا گیا۔ اس نے تسخیر سندھ میں تعاون کا وعدہ کیا اور آئندہ مہمات میں ساتھ رہا۔ راجا بجہرا کو جو ابھی تک سیسم میں ہی مقیم تھا۔ وہاں سے نکالا نہ جا سکا۔ اس پر محمد بن قاسم نے سیسم پر حملہ کر دیا۔ راجا بجہرا نے دوسرے سرداروں کے ساتھ مل کر مقابلہ کیا اور سبھی مارے گئے۔ سیسم پر مسلمانوں کا قبضہ ہو گیا۔ باقی ماندہ فوج نے مسلمانوں کی اطاعت قبول کر لی۔

سیسم کی فتح کے بعد حجاج کی طرف سے حکم ملا کہ راجا داہر کے پایہ تخت پر حملہ کیا جائے اور خود راجا داہر سے مقابلہ کیا جائے۔ اس لیے محمد بن قاسم نیروان واپس پہنچا اور داہر کے پایہ تخت پہنچنے کی تیاریاں کرنے لگا۔ چنانچہ اس نے اشیہار کے قلعہ پر حملہ کیا۔ جہاں لوگوں نے خندق کھود کر زبردست حفاظتی انتظامات کر رکھے تھے۔ ایک ہفتہ کے سخت محاصرہ کے بعد اہل قلعہ نے اطاعت قبول کر لی۔ اور محمد بن قاسم ان سے حسن سلوک سے پیش آیا۔

محمد بن قاسم کے لیے دریا عبور کرنا مشکل تھا۔ جب تک اسے سورتہ کے حاکم راجا موکا کا تعاون حاصل نہ ہو۔ چنانچہ اس نے موکا کو خط لکھ کر اطاعت اسلام قبول کرنے کی دعوت دی اور اسے اپنے علاقے کے علاوہ کچھ کا حکمران بھی بنانے کا وعدہ کیا۔ راجا نے لکھا کہ میری داہر کے ساتھ قرابت داری ہے۔ اس لیے اگر کھلم کھلا میں آپ کا ساتھ دیتا ہوں تو خاندان کی ناک کٹتی ہے۔ اپنے بیس سرداروں کے ساتھ لڑکی کی شادی کرنے کے بہانے ساکڑ جاتا ہوں۔ آپ ایک ہزار سپاہ بھیج کر مجھے گرفتار کرو لیجیے۔ چنانچہ محمد بن قاسم نے موکا کو گرفتار کر لیا۔ اور اسے بیس ٹھاکر گرفتار ہو گئے۔ محمد بن قاسم نے راجا موکا کی عزت افزائی کے لیے ان کے رواج کے مطابق اسے سردربار کرسی پر بٹھایا اور خلعت فاخرہ سے نوازا تاکہ تالیف قلب ہو سکے۔

محمد بن قاسم چاہتا تھا کہ دریائے سندھ کو عبور کرکے داہر کا مقابلہ کرے کہ داہر نے موکا کی اطاعت سے برہم ہو کر ایک فوج بھیجی جو دریائے سندھ کو عبور کرکے مسلمانوں کے مقابلہ پر آئی لیکن شکست کھائی۔ محمد بن قاسم نے ایک نو مسلم کو راجا داہر کے دربار میں سفیر بنا کر بھیجا۔ سفیر جو دیبل کا ایک معزز ہندو گھرانے سے متعلق تھا اور راجا داہر اسے اچھی طرح جانتا تھا۔ اس کے دربار میں شاہی آداب بجا لانے سے انکار کر دیا۔ اس پر راجا داہر سخت برہم ہوا اور کہا کہ ’’افسوس تم سفیر بن کر آئے ہو ورنہ قتل کے سوا تمہاری کوئی سزا نہ تھی۔‘‘ سفارت ناکام ہو گئی اور راجا داہر اپنا لشکر لے کر دریائے سندھ کے مشرقی کنارے پر خیمہ زن ہو گیا اور اپنے ایک سردار کو دریائے سندھ کی حفاظت پر متعین کر دیا۔ تاکہ اسلامی لشکر دریا عبور نہ کر سکے۔ اسی دوران سیوستان میں بغاوت ہو گئی۔ جس کو فرو کرنے کے لیے محمد بن قاسم کو ایک دستہ روانہ کرنا پڑا۔

محمد بن قاسم کے لیے بڑا مسئلہ دریا عبور کرنا تھا۔ داہر نے موکا کے بھائی راسل کو دریا کی حفاظت پر متعین کر رکھا تھا۔ مسلمانوں نے کشتیوں کا پل بنانے کا ارادہ کیا۔ لیکن دوسرے کنارے پر راسل کے سپاہی اس کوشش کو کامیاب نہیں ہونے دیتے تھے۔ بالآخر ایک رات مسلمانوں نے کشتیوں کو دریا کے طول کے رخ پر کھڑا کرکے انہیں عرض کے رخ پر کھینچ دیا۔ راجا راسل کے جن سپاہیوں نے مزاحمت کی وہ تیر اندازوں کے ہاتھ سے مارے گئے اور مسلمانوں فوج نے دریا عبور کرکے راسل کی فوج پر بھرپور حملہ کر دیا اور ان کے قلعے فہم کے پھاٹک تک ان کا تعاقب کیا۔ صبح راجا داہر کو مسلمان فوج کے دریا عبور کرنے اور راسل کی شکست کی خبر سنائی گئی۔ تو اس نے اسے بدشگونی قرار دیا اور راجا راسل نے بھی بدلتے ہوئے حالات کو بھانپ کر محمد بن قاسم کی اطاعت قبول کر لی۔

اسلامی لشکر پیش قدمی کرتا ہوا۔ نرانی۔ نامی گاؤں پر قابض ہو گیا۔ راجا داہر کے بالکل سامنے واقع قصبہ کاجی جاٹ میں مقیم تھا۔ درمیان میں صرف ایک جھیل تھی۔ موکا اور راسل نے ایک کشتی کے ذریعے تین تین آدمی جھیل کے پار بھیجنے شروع کر دیے۔ یہاں تک کہ تمام لشکر پار جا اترا۔ راجا نے اپنے اہل و عیال کو دراوڑ کے قلعے میں بند کر دیا اور خود لڑائی کی تیاری کی۔

راجا داہر ایک سو ہاتھیوں، دس ہزار زرہ پوش سوار اور تیس ہزار پیدل فوج کے ساتھ دریائے سندھ کے کنارے مقابلہ پر آیا۔ چار دن تک مقابلہ جاری رہا۔ منہ زور ہاتھیوں کے سامنے مسلمانوں کا زور نہ چلتا تھا۔ آخر پانچویں مسلمانوں مسلمانوں نے پچکاریوں کے ذریعہ آتش گیر مادہ ہاتھیوں پر پھینکنا شروع کیا۔ جس سے وہ بھاگ کھڑے ہوئے۔ راجا داہر کا ہاتھ بھی میدان سے بھاگا۔ لیکن راجا داہر ہاتھی سے اتر کر پیادہ لڑتا رہا یہاں تک کہ ایک عرب نے اس کا کام تمام کر دیا۔ اس کے مرتے ہی فوج قلعہ دراوڑ کی طرف بھاگ گئی۔ اس معرکہ میں محمد بن قاسم کی کل فوج ساڑھے پندرہ ہزار تھی جن میں 4 ہزار سندھی جاٹ بھی شامل تھے۔ اور تین ہزار فوج موکا کی تھی۔

راجا داہر کے لڑکے جے سنگھ نے شکست خورہ فوج کو راوڑ میں جمع کیا اور مقابلہ کی ٹھانی لیکن اس کے دوستوں نے مشورہ دیا کہ رواڑ کی بجائے برہمن آباد زیادہ محفوظ مقام ہے وہاں جاکر مقابلہ کرنا چاہیے۔ جے سنگھ تو برہمن آباد چلا گیا۔ لیکن راجا داہر کی بیوی رانی بھائی (راجا داہر کی بہن جس کے ساتھ اس نے خود شادی بھی کی تھی۔ تاریخ سندھ 78) نے مقابلہ کیا۔ لیکن جب دیکھا کہ قلعہ بچانا مشکل ہے تو اس نے دوسری عورتوں سمیت ستی کی رسم ادا کی اور راوڑ پر مسلمانوں کے قدم مضبوط ہو گئے۔

محمد بن قاسم راوڑ سے برہمن آباد کی طرف بڑھا۔ راستے مین بہرور اور وہلیلہ دو مضبوط قلعے پڑتے تھے۔ محمد بن قاسم پہلے بہرور پر حملہ آور ہوا۔ اور دو ماہ کے سخت محاصرے اور شب و روز کی جنگ کے بعد بہرور پر قبضہ کر لیا۔ اس کے وہلیلہ پر حملہ کیا۔ یہاں کے لوگ بد دل ہوکر بھاگ کھڑے ہوئے۔ اور قلعہ با آسانی فتح ہو گیا۔

راجا داہر کا دور اندیش وزیر سی ساکر بھانپ گیاتھا کہ اب مسلمانوں کے حملے کو روکنا ناممکن ہے۔ اس نے محمد بن قاسم کے پاس جان بخشی کی درخواست کی او ر تعاون کا یقین دلایا۔ اور وہ عورتیں بھی پیش کیں جن کو قزاقوں نے لوتا تھا۔ اور جن کی وجہ سے سندھ پر حملہ ہوا تھا۔ سی ساکر نے خیر خواہی اور وفاداری سے محمد بن قاسم کا اعتماد حاصل کر لیا۔ محمد بن بن قاسم نے بھی اسے اپنا مشیر خصوصی بنا لیا او راس کے مشورے سے وہلیلہ کی حکومت ایک ہندو نوبہ کے حوالے کی گئی۔

راجا داہر کا لڑکا جے سنگھ اپنی فوج کے ساتھ یہاں مقیم تھا۔ جن دنوں برہمن آباد پر محمد بن قاسم نے حملہ کیا۔ ان دنوں جے سنگھ فوجی ضروریات کے تحت باہر گیا ہو تھا۔ جب وہ واپس لوٹا تو اسلامی فوجیں شہر کا محاصرہ کر چکی تھیں۔ جے سنگھ نے مسلمانوں کی رسد بند کرنے کی کوشش کی۔ لیکن راجا موکا کی قیادت میں ایک دستے نے اس پر حملہ کیا تو وہ شہر کو اپنے بھائی گوپی کے حوالے کرکے کشمیر کی طرف نکل گیا۔ چند دنوں بعد شہر پر مسلمانوں کا قبضہ ہو گیا۔ یہاں راجا داہر کی بیوی لاڈی گرفتاری وئی۔ محمد بن قاسم نے حجاج کی اجازت سے اس کے ساتھ شادی کر لی۔

ارور جو روہڑی سے پانچ میل کے فاصلے پر واقع ہے، راجا داہر کی راجدھانی اور سندھ کا اہم ترین مقام تھا۔ برہمن آباد کی فتح کے بعد حجاج بن یوسف نے ملکی انتظام کے بارے میں بہت سی ہدایات دیں اور ساتھ ہی ارور اور ملتان فتح کرنے کا حکم دیا۔ چنانچہ محمد بن قاسم برہمن آباد کی رہنمائی میں اسلامی لشکر ارور پہنچا۔ ایک ماہ کے بعد اہل قلعہ صلح پر آمادہ ہو گئے۔ اور عربوں نے شہر پر قبضہ کر لیا۔ داہر کا بیٹا گوپی قلعہ چھوڑ کر بھاگ گیا۔

ارور کی فتح کے بعد محمد بن قاسم نے ملتان کی طرف پیش قدمی کی راستے میں قلعہ بابیہ تھا۔ جن پر راجا داہر کا بھتیجا کسکا حکمران تھا۔ جو داہر کے قتل کے بعد اس قلعہ پر قابض ہو گیا تھا۔ محمد بن قاسم نے لوگوں سے تحقیق کی کہ وہ واقعی داہر کے خاندان سے ہے۔ اس کے بعد کاہ کہ اگر میرے پاس آئے تو میں اس کی قدر افزائی کروں۔ کسکا کو معلوم ہوا تو فوراً حاضر خدمت ہوا اور وزیر مال مقرر ہوا۔ اور قلعہ فتح ہو گیا۔ اس کے بعد اسکندہ پر حملہ کیا گیا جو کم و بیش ایک ہفتہ کی مزاحمت کے بعد فتح ہوا۔ یہاں کے حاکم سنگھ رائے بھاگ کر سکہ چلا گیا۔ جہاں کا حاکم بجہرا کا نواسہ تھا۔ اس لیے اپنے نانا کا انتقام لینے کے لیے لڑا۔ لیکن ایک رات قلعہ سے بھاگ کر ملتان کی طرف نکل گیا۔ اورقلعہ مسلمانوں کے قبضہ میں آ گیا۔

ملتان سندھ کا اہم سیاسی، ثقافتی اور مذہبی مرکز تھا۔ یہاں گور سنگھ کی حکومت تھی۔ جو بہت مضبوط راجا سمجھا جاتا تھا۔ اس نے دو روز تک قلعہ سے باہر نکل کر مسلمانوں کا مقابلہ کیا۔ سخت جنگ ہوئی۔ جس میں بہت سے اہم مسلمان جرنیل شہید ہو گئے۔ اس کے بعد وہ قلعہ بند ہو گیا۔ اس بے آب و گیاہ علاقہ میں مسلمانوں کے لیے زیادہ دیر تک محاصرہ جاری رکھنا ممکن نہ تھا۔ ان کے لشکر میں قحط پڑ گیا۔ اس لیے انہوں نے بھرپور حملہ کرکے شہر پر قبضہ کرکے قحط سے نجات پانے کا منصوبہ بنایا بہت زودار معرکے ہوئے۔ بالآخر مسلمانوں کو اس نالے کا علم ہو گیا جو اہل شہر کو پانی مہیا کرتا تھا۔ انہوں نے اس کا رخ بدل دیا۔ اہل شہر پیاسے مرنے لگے اور مجبوراً قلعہ سے باہر نکل کر لڑے۔ لیکن شکست کھا کر پھر قلعہ بند ہو گئے اتفاقاً ایک قیدی سے مسلمانوں کو قلعہ کی فصیل کا کمزور حصہ معلوم ہو گیا۔ اور دو تین دن کی سنگ باری سے شہر کی فصیل ٹوٹ گئی۔ اور مسلمان قلعہ میں داخل ہو گئے۔ ملتان سے محمد بن قاسم کو ایک مندر کا محفوظ خزانہ ہاتھ لگا جو سینکڑوں من سونے پر مشتمل تھا۔ محمد بن قاسم نے اس خزانہ سے وہ وعدہ پورا کیا جو حجاج نے خلیفہ ولید سے کیا تھا کہ وہ مہم پر خرچ ہونے والی تمام رقم کا دگنا شاہی خزانہ میں داخل کر دے گا۔

ملتان محمد بن قاسم کی آخری قابل ذکر فتح تھی۔ اس کے بعد اس نے کچھ سرحدی قلعے مزید فتح کیے۔ انتظام سلطنت کو درست کیا۔ وہ چاہتا تھا کہ وہ قنوج پر بھی حملہ کرے۔ اس مقصد کے لیے اس نے ایک لشکر روانہ کیا اور اودہے پور تک گیا۔ خود وہ کشمیر کی طرف بڑھا۔ لیکن اس دوران میں حجاج بن یوسف کا انتقال ہو گیا۔ نیز خلیفہ ولید بن عبد الملک بھی چل بسا۔ اور نئے خلیفہ سلیمان بن عبد الملک نے محمد بن قاسم کی گرفتاری اور واپسی کے احکام صادر کر دیے