بجرنگ دل

بجرنگ دل (انگریزی: Bajrang Dal) ایک مذہبی تشدد پسند اور عسکریت پسند تنظیم ہے۔[1] یہ وشو ہندو پریشد کی یوتھ ونگ ہے اور اس کا تعلق سنگھ پریوار سے ہے۔[2] تنظیم ہندوتوا اور ہندو قومیت کے نظریے پر مبنی ہے۔[3][4] اس کی بنیاد 1 اکتوبر 1984ء کو اتر پردیش میں رکھی گئی تھی اور اب یہ ملک بھر میں پھیل چکی ہے۔[5] البتہ یہ ملک کے شمالی اور وسطی علاقوں میں زیادہ سرگرم ہے۔ راشٹریہ سویم سیوک سنگھ کی شاخوں کی طرح اس کی بھی اکھاڑا ہوتی ہے۔ فی الحال کل اکھاڑے تقریباً 2500 ہیں۔ بجرنگ نام ہندو مت کے بھگوان ہنومان کے نام پر پڑا جسے بجرنگ بلی کہا جاتا ہے۔ بجرنگ دل کا نعرہ ‘سیوا،سوراکسا، سنسکریتی‘ یعنی خدمت، تحفظ اور تہذیب ہے۔ بجرنگ دل کے اہم منصوبوں میں ایودھیا میں رام جنم بھومی، متھرا میں کرشن جنم بھومی اور وارانسی میں کاشی وشوناتھ مندر کی تعمیر ہے۔ ان تینوں مقامات کو ہندو مت میں مقدس عبادت گاہوں کا درجہ دیا جاتا ہے۔ دیگر منصوبہ جات میں مسلمانوں کی بڑھتی آبادی، اشتمالیت اور مسیحی مشنری سے ہندو مذہب کے ماننے والوں کو بچانا اور گاو کشی پر روک لگانا ہے۔