கனகசபாபதி சிறீபவன்

நடராஜா கனகசபாபதி என்பவரின் மகனான சிறீபவன் யாழ்ப்பாணம் இந்துக் கல்லூரியில் 1962 முதல் 1972 வரை கல்வி பயின்றார்.[7] பின்னர் இலங்கை சட்டக் கல்லூரியில் 1974 ஆம் ஆண்டில் இணைந்து 1976 ஆம் ஆண்டில் வழக்கறிஞராக வெளியேறினார்.[7] 1977 முதல் 1978 வரை வழக்கறிஞராகப் பணியாற்றிய சிறீபவன்,[7] 1978 இல் சட்டமா அதிபர் திணைக்களத்தில் பணியில் சேர்ந்தார்.[7]

1996 பெப்ரவரி 22 இல் பிரதி சட்டமாதிபராக நியமிக்கப்பட்டார்.[7] 1992 இல் கொழும்பு பல்கலைக்கழகத்தில் தொழிற்துறை சட்ட டிப்புளோமா பட்டமும், 1994 ஆம் ஆண்டில் இலண்டன் பல்கலைக்கழகத்தில் சட்ட முதுகலைப் பட்டமும் பெற்றார்.[7]

2002 ஆம் ஆண்டில் மேன்முறையீட்டு நீதிமன்ற நீதியரசராக நியமிக்கப்பட்டார்.[7] 2007 ஆம் ஆண்டில் மேன்முறையீட்டு நீதிமன்றத்தின் தலைவராகத் தேர்ந்தெடுக்கப்பட்டார்.[8] 2008 ஆம் ஆண்டில் உச்சநீதிமன்றத்தில் நியமனம் பெற்றார்.[9][10]

2013 சனவரியில் தலைமை நீதிபதி சிராணி பண்டாரநாயக்கா சர்ச்சைக்குரிய முறையில் இலங்கை நாடாளுமன்றத்தினால் குற்றப்பிரேரணை சமர்ப்பிக்கப்பட்டு,[11] அரசுத்தலைவர் மகிந்த ராசபக்சவினால் பதவியில் இருந்து அகற்றப்பட்டார்.[12][13] அவருக்குப் பதிலாக சட்டமா அதிபர் மொகான் பீரிஸ் தலைமை நீதிபதியாக நியமிக்கப்பட்டார்.[14][15] 2015 அரசுத்தலைவர் தேர்தலில் ராசபக்ச தோவியடைந்து மைத்திரிபால சிறிசேன வெற்றி பெற்றார். சிராணி பண்டாரநாயக்கா சட்ட விதிகளுக்கு அமைய பதவியில் இருந்து அகற்றப்படவில்லை எனவும், அது சட்டத்துக்கு முரணானது என்றும் கூறி அவரது பதவியை 2015 சனவரி 28 அன்று மீள்வித்தார்.[16][17][18] பண்டாரநாயக்கா பதவியில் அமர்ந்து அடுத்த நாள் சனவரி 29 அன்று தனது பதவியில் இருந்து அதிகாரபூர்வமாக ஓய்வு பெற்றார்.[19][20][21] இதனை அடுத்து சிறீபவன் இலங்கையின் 44வது தலைமை நீதிபதியாக 2015 சனவரி 30 அன்று மைத்திரிபால சிறிசேனவினால் நியமிக்கப்பட்டார்.[22][23][24]