കാട്ടുപൂച്ച

5 മുതൽ 6 കിലോ വരെ തൂക്കമുള്ള കാടുപ്പൂച്ചയുടെ ശരീരത്തിൻറെ മൊത്തം നീളം 50 സെ. മീറ്ററാണ്.

ഇവയുടെ നിറം മഞ്ഞകലർന്ന തവിട്ടോ ചാര നിറം കലർന്ന തവിട്ടോ ആണ്. നീളം കുറഞ്ഞ കറുത്ത രോമക്കൂട്ടങ്ങൾ നിറഞ്ഞ ചെവികൾക്ക് ചുവപ്പ് നിറമാണ്. വണ്ണം കുറഞ്ഞ്, നീണ്ട മുൻകാലുകളിലും, വളർത്തു പൂച്ചയുടേതിനേക്കാൾ ചെറുതായ വാലിലും ഉടനീളം രണ്ടു കറുത്തവരകളുണ്ട്. വാലിന്റെ അറ്റം കറുപ്പ് നിറമാണ്. നെറ്റിയിലും പുറംകാലിലും കാണുന്ന മങ്ങിയ ചുവപ്പുനിറം ഒഴിച്ചാൽ രോമക്കുപ്പായത്തിൽ ഇതിന് മറ്റ് അടയാളങ്ങളൊന്നുമില്ല.കണ്ണുകൾക്കു ചുറ്റും വെളുപ്പു നിറമുള്ള ഇവയുടെ രണ്ടു കവിളുകളിലും താഴേക്ക്‌ ഒലിച്ചിറങ്ങുന്ന കണ്ണുനീർ പോലെ ഇരുണ്ട വരകളുണ്ട്. തെക്കേ ഇന്ത്യയിൽ കാണപ്പെടുന്ന ഇതിന്റെ ഇനം കൂടുതൽ ചാരനിരമുള്ളതാണ്. ഇവയിലെ ആണിന്റെ ശരീരം പുള്ളികളോ അടയാളങ്ങളോ നിറഞ്ഞവയായും കാണപ്പെടുന്നു.

മനുഷ്യവാസം ഉള്ളിടത്ത് ഇവ കൂടെക്കൂടെ വരാറുണ്ട്. തങ്ങളേക്കാൾ വളരെ വലിപ്പമുള്ള മൃഗങ്ങളെ ഇവ വേട്ടയാടാറുമുണ്ട് (ഉദാ: മുള്ളൻപ്പന്നി). ഭയപ്പെടുമ്പോൾ ഇവ മറ്റെല്ലാ പൂച്ചകളെയും പോലെ ചെവിയുയർത്തി നിൽക്കും. ഏകാന്തരായും ഇണകളായും ഇവയെ കാണാറുണ്ട്‌. ചെറിയ സസ്തിനികൾ, പക്ഷികൾ മുതലായവയാണ് ഇവയുടെ പ്രധാന ഭക്ഷണം.

രാന്ധംഭോർ നാഷണൽ പാർക്ക്‌ (രാജസ്ഥാൻ), കാസിരംഗ നാഷണൽ പാർക്ക്‌ (ആസാം) എന്നിവിടങ്ങളിൽ ഇവയെ കാണാറുണ്ട്‌. പുൽപ്രദേശം, കുറ്റിക്കാട്, വരണ്ട ഇലപൊഴിയും കാടുകൾ, നിത്യഹരിത വനങ്ങൾ, ഗ്രാമങ്ങൾ തുടങ്ങിയവയാണ് ഇവയുടെ ആവാസ കേന്ദ്രങ്ങൾ. ഹിമാലയത്തിന്റെ ഉയർന്ന പ്രദേശങ്ങളൊഴിച്ച് ഇന്ത്യയിൽ എല്ലായിടവും (2400 മീ വരെ) ഇവയെ കാണാൻ സാധിക്കുന്നു.

വംശനാശഭീഷണി കുറവുള്ളവയാണ് കാട്ടുപൂച്ച. വേട്ട, ആവാസ പ്രദേശത്തെ ഉപദ്രവങ്ങൾ തുടങ്ങിയവയാണ് ഇവയുടെ നിലനിൽപ്പിനു ഭീഷണിയാകുന്ന ഘടകങ്ങൾ.

• കേരളത്തിലെ സസ്തനികൾ