பெரியபாளையம்

பாளையம் என்றால் "படை வீடு" (இராணுவத் தளம்). பெரியபாளையம் என்பது பெரிய படைவீடு எனப் பொருள்படும். [6]

பெரியபாளையம், சென்னையிலிருந்து 40 கி.மீ. தொலைவில், சென்னை - செங்குன்றம் - காரணோடை - ஊத்துக்கோட்டை - புத்தூர் மாநில நெடுஞ்சாலையில், ஆரணியாற்றங்கரையில் அமைந்துள்ளது.
2001 மக்கட்தொகை கணக்கெடுப்பின் படி, பெரியபாளையத்தின் மொத்த மக்கட்தொகை 5420 இதில், ஆண்கள் 2756 மற்றும் பெண்கள் 2664 [7]

பெரியபாளையம் என்ற சிற்றூர், இங்குள்ள அருள்மிகு ரேணுகாதேவி பவானியம்மன் திருக்கோயில் மூலமே அடையாளம் காணப்படுகிறது. இத்திருத்தலத்தில் வீற்றிருக்கும் அம்மன், ஊரின் பெயராலே பெரியபாளையத்தம்மன் என்று வழங்கப்படுகின்றார். ஆண்டின் ஆடி மற்றும் ஆவணி மாதங்கள் முழுவதும் பக்தர்கள் அம்மனை தரிசிக்க சென்னை, திருவள்ளூர், காஞ்சிபுரம் மாவட்டங்களிலிருந்தும், ஆந்திர மாநிலம் - புத்தூர், நகரி, நாகலாபுரம், நெல்லூர் ஆகிய இடங்களிலிருந்தும் குடும்பமாக வந்து கோயிலை சுற்றியுள்ள திறந்த வெளியில் முகாமிட்டு, அம்மனையும் தரிசித்து செல்வது வழக்கம்.