കയ്യൂർ

തെയ്യം, തോറ്റംപാട്ട്, പൂരക്കളി, കോൽക്കളി തുടങ്ങിയവയാണു് കയ്യൂരിലെ പ്രധാന നാടൻകലകൾ. പ്രാദേശികമായ നാടക സംരംഭങ്ങൾ ഇവിടെ കൂറേ നടന്നിട്ടുണ്ട്. ഓലച്ചൂട്ടും പന്തലും റാന്തൽ വിളക്കും കൊളുത്തി മഹാകവി കുട്ടമത്തിന്റെ ബാലഗോപാലനും, ഹരിശ്ചന്ദ്രനുമൊക്കെ അരങ്ങിലെത്തിയിരുന്നു. തെയ്യം സംരക്ഷിക്കപ്പെടുന്ന ഒരു ക്ഷേത്രകലയായി ഇന്നും കയ്യൂരിലെ പള്ളിയറകളിൽ നടക്കുന്നു. ക്ഷേത്രങ്ങളുമായി ബന്ധപ്പെട്ട് പൂരക്കളി സമീപകാലത്ത് കൂടുതൽ സജീവമായിട്ടുണ്ട്. വിജ്ഞാനവും വിനോദവും കായികാഭ്യാസവും ഒത്തുചേരുന്ന മറത്തുകളി ഇവിടെ സജീവമാണു്.