ഇൻസാസ്

ഇന്ത്യയിലെ ഓർഡിനൻസ് ഫാക്ടറീസ് ബോർഡ്[1] വികസിപ്പിച്ചെടുത്ത ഒരു ഇൻഫൻട്രി ആയുധശൃംഖലയാണ് ഇൻസാസ് (INSAS) എന്നറിയപ്പെടുന്നത്. ഇന്ത്യൻ സ്മോൾ ആം സിസ്റ്റം എന്നാണ് ഇൻസാസിന്റെ പൂർണ്ണരൂപം. ഒരു അസാൾട്ട് റൈഫിൾ, ഒരു ലൈറ്റ് മെഷീൻ ഗൺ എന്നിവ ഇതിൽ ഉൾപ്പെടുന്നു. 1998 മുതൽ ഇന്ത്യയിലെ എല്ലാ സശസ്ത്ര സൈന്യങ്ങളും ആയുധമായി ഉപയോഗിക്കുന്നു. കാർഗിൽ യുദ്ധത്തിൽ ഉപയോഗിക്കപ്പെട്ട[2] ഇവ ഇപ്പോൾ റോയൽ ഭൂട്ടാൻ ആർമി, നേപ്പാളീസ് ആർമി, ആർമി ഓഫ് ഒമാൻ എന്നീ സൈന്യങ്ങളും ഉപയോഗിച്ചു തുടങ്ങിയിരിക്കുന്നു.

ഇൻസാസ്

ഇൻസാസ് റൈഫിൾ: യുദ്ധോപകരണങ്ങളിൽ ഇന്ത്യയുടെ സമ്മാനം
വിഭാഗം അസോൾട്ട് റൈഫിൾ
ഉല്പ്പാദന സ്ഥലം  ഇന്ത്യ
സേവന ചരിത്രം
ഉപയോഗത്തിൽ 1998–തുടരുന്നു
യുദ്ധങ്ങൾ കാർഗിൽ യുദ്ധം
നേപ്പാളീസ് സിവിൽ യുദ്ധം
നിർമ്മാണ ചരിത്രം
രൂപകൽ‌പ്പന ചെയ്തയാൾ ഡി.ആർ.ഡി.ഒ
നിർമ്മാതാവ്‌ ഓർഡിനൻസ് ഫാക്ടറീസ് ബോർഡ്
വിശദാംശങ്ങൾ
ഭാരം 4.25 kg (9.4 lb) കാലി


4.6 kg (10.1 lb) നിറ

നീളം 960 mm (37.8 in),
750 mm (29.5 in)
ബാരലിന്റെ നീളം 464 mm (18.3 in)
കാട്രിഡ്ജ് 5.56x45mm INSAS
5.56x45mm NATO
5.56×30mm MINSAS
റേറ്റ് ഓഫ് ഫയർ മിനിറ്റിൽ 150
മസിൽ വെലോസിറ്റി 900 m/s (2,953 ft/s)
എഫക്ടീവ് റേഞ്ച് 450 മീറ്റർ
സൈറ്റ് ഇൻ-ബിൽറ്റ്

ചരിത്രം

കാലങ്ങളായി ഇന്ത്യൻ സൈന്യം ഉപയോഗിച്ചുകൊണ്ടിരുന്നത് 7.62 എസ്.എൽ.ആർ പോലുള്ള റൈഫിളുകളാണ്. എന്നാൽ ഇവയുടെ ചെറുഭാഗങ്ങൾ എൽ.എം.ജി, കാർബൈൻ പോലുള്ള മറ്റ് അനുബന്ധ ഉപകരണങ്ങളുമായി പരസ്പരം വച്ചുമാറാൻ കഴിയാത്തതിനാൽ യുദ്ധസമയങ്ങളിൽ ഏതെങ്കിലും റൈഫിളിന് ചെറിയ കേടുപാടുകൾ സംഭവിച്ചാൽ പോലും അത് പാടേ ഉപേക്ഷിക്കേണ്ടി വരുന്ന അവസ്ഥയാണ് നില നിന്നിരുന്നത്. ഈ അവസരത്തിലാണ് ഇന്ത്യൻ സൈന്യം ഇതിനൊരു പോംവഴി ആലോചിക്കുന്നത്.[3]

ഗൂർഖാ റെജിമെന്റ്:
ഇൻസാസ് ഉപയോഗിക്കുന്ന ഒരു സൈനിക ദളം

അങ്ങനെ ഇന്ത്യൻ പ്രതിരോധരംഗത്ത് ഗവേഷണം നടത്തുന്ന ഡിഫൻസ് റിസേർച്ച് ആൻഡ് ഡെവലപ്‌മെന്റ് ഓർഗനൈസേഷൻ(ഡി.ആർ.ഡി.ഒ) പൂനെയിലുള്ള അവരുടെ പ്രധാന ലബോറട്ടറിയായ എ.ആർ.ഡി.എ യിൽ[4] വെച്ച് രൂപകല്പന ചെയ്ത ആയുധശ്രേണിയാണ് ഇൻസാസ്

5.56x45mm NATO അമ്മ്യൂനീഷൻ ഉപയോഗപ്പെടുത്താൻ പറ്റിയ തരത്തിൽ മൂന്ന് ഉപകരണങ്ങൾ നിർമ്മിക്കാനായിരുന്നു ധാരണ. ഒരു സാധാരണ റൈഫിൾ, ഒരു കാർബൈൻ, ഒരു എൽ.എം.ജി.. മൂന്ന് ഉപകരണങ്ങളിലും പൊതുവായി 5.56x45mm NATO ഉപയോഗിക്കാനും ധാരണയായി. 1997 ൽ റൈഫിൾ പൂർണ്ണമായും സജ്ജമായി. 1998 ലെ ഇന്ത്യൻ റിപ്പബ്ലിക് ദിന പരേഡിൽ ഇന്ത്യൻ സൈന്യം ഇൻസാസ് റൈഫിൾ ഉപയോഗിച്ചു. നിലവിൽ ഇന്ത്യയിൽ 3,00,000 ഇൻസാസ് റൈഫിളുകൾ സേവനം നടത്തുന്നു.

രൂപകൽപ്പന

ഇൻസാസിന്റെ രൂപകൽപ്പന അടിസ്ഥാനപരമായി കലാഷ്‌നിക്കോവ് എ.കെ-47 നോടും 7.62 എം. എം. സെൽഫ് ലോഡിംഗ് റൈഫിളിനോടും സാദൃശ്യമുള്ളതാണ്. ഈ രണ്ട് റൈഫിളുകളുടേയും സാങ്കേതികത സമന്വയിപ്പിച്ചാണ് ഇൻസാസ് നിർമ്മിച്ചിരിക്കുന്നത്. ഇതിലെ വായുനിയന്ത്രണ സംവിധാനം, റൊട്ടേറ്റിംഗ് ബോൾട് എന്നിവയ്ക്ക് എ.കെ-47 നോട് സാദൃശ്യമുള്ളതാണ്. സെൽഫ് ലോഡിംഗ് റൈഫിളിലേതുപോലെ ഫയർ ചെയ്യുമ്പോളുണ്ടാകുന്ന വായു നിയന്ത്രിക്കുന്നതിനായി ഒരു ഗ്യാസ് റെഗുലേറ്റർ ഇൻസാസിലും ഉപയോഗിച്ചിട്ടുണ്ട്. ഉപയോഗിക്കാത്തപ്പോൾ മടങ്ങിയിരിക്കുന്ന രീതിയിൽ ക്യാരിയിംഗ് ഹാന്റിൽ നിർമ്മിച്ചിരിക്കുന്നു.

ഇടത് വശത്ത് പിസ്റ്റൾ ഗ്രിപ്പിനു മുകളിലായി സേഫ്റ്റി സ്വിച്ച് ക്രമീകരിച്ചിരിക്കുന്നു. സേഫ്റ്റി സ്വിച്ച് ക്രമീകരിച്ച് മൂന്നുതരത്തിൽ ഫയർ ചെയ്യാൻ കഴിയും. ഓരോ റൗണ്ട് വീതം (Single Round), മുമ്മൂന്നു റൗണ്ട് വീതം (Three Round), തുടർച്ചയായി (Burst Fire). ബട്ട് രണ്ട് തരത്തിൽ ലഭ്യമാണ്: സാധാരണയും മടക്കാവുന്നതും. ലോഹമല്ലാത്ത ഭാഗങ്ങളെല്ലാം പോളിമറിനാൽ നിർമ്മിതമാണ്. അർദ്ധസുതാര്യമായ മാഗസിൻ സാധാരണ 20 റൗണ്ടുകൾ ഉൾക്കൊള്ളുന്നവയാണ്. എന്നാൽ ഇൻസാസ് എൽ.എം.ജിയ്ക്കായി 30 റൗണ്ടുകൾ ഉൾക്കൊള്ളുന്ന മാഗസിനുകളുമുണ്ട്. അത് റൈഫിളിലും ഉപയോഗിക്കാവുന്നതാണ്. ബാരലിനു മുൻവശത്തായി ബയണറ്റും ഗ്രനേഡും ഘടിപ്പിക്കാനുള്ള രീതിയിൽ രൂപീകരിച്ചിരിക്കുന്നു.

സവിശേഷതകൾ

പ്രധാനമായും എ.കെ-47 റൈഫിൾ ശൃംഖലയെ അടിസ്ഥാനപ്പെടുത്തി നിർമ്മിച്ചതാണെങ്കിലും ചില അപൂർവ്വ സവിശേഷതകൾ ഇൻസാസിന്റെ പ്രത്യേകതയാണ്.

  • ഇൻസാസ് സ്റ്റന്റേർഡ് റൈഫിൾ (5.56mm), ഇൻസാസ് ഫോൾഡബിൾ ബട്ട് (5.56mm), ഇൻസാസ് എൽ.എം.ജി.(5.56mm) എന്നിവ ഈ ശൃംഖലയിൽ രൂപീകരിച്ച ആയുധങ്ങളാണ്.[5] [6]. ഈ മൂന്നു ആയുധങ്ങളിലും ഉപയോഗിക്കുന്ന ആന്തരിക ഉപകരണങ്ങൾ പരസ്പരം മാറി ഉപയോഗിക്കാവുന്നതാണ്. അതായത് യുദ്ധത്തിനിടയിൽ ഇൻസാസ് എൽ.എം.ജി ഏതെങ്കിലും കാരണവശാൽ പ്രവർത്തനരഹിതമായാൽ ഒരു സാധാരണ റൈഫിളിന്റെ ആന്തരിക ഉപകരണങ്ങൾ ഘടിപ്പിച്ച് എൽ.എം.ജി യുടെ പ്രവർത്തനം തുടരാവുന്നതാണ്.
    ഇൻസാസ് എൽ.എം.ജി,
    .
  • ഇന്ത്യൻ സൈനികർ ഉപയോഗിച്ചുകൊണ്ടിരുന്ന 7.62 എസ്.എൽ.ആർ റൈഫിളുമായി താരതമ്യപ്പെടുത്തുമ്പോൾ ഈ റൈഫിൾ 25 ശതമാനത്തോളം ഭാരം കുറഞ്ഞതും കൂടുതൽ സൗകര്യപ്രദവുമാണ്.
  • ഫയർ ചെയ്യുമ്പോൾ പുറകോട്ടുണ്ടാകുന്ന തള്ളൽ 70 ശതമാനം കുറവായതിനാൽ ഈ റൈഫിൾ കൊണ്ട് ഫയർ ചെയ്യുന്നത് കൂടുതൽ ഫലപ്രദമാണ്.
  • ഈ റൈഫിളിന്റെ വകഭേദങ്ങളിലൊന്നിൽ (ഇൻസാസ് ഫോൾഡബിൾ ബട്ട് (5.56mm)) റൈഫിളിന്റെ ബട്ട് മടക്കി ഉപയോഗിക്കാവുന്നതാണ്.

പ്രധാന വിവരങ്ങൾ

5.56 എം.എം. ഇൻസാസ് 1 എ യുടെ പ്രധാന വിവരങ്ങൾ

ഭാരം:
  • മാഗസിൻ കൂടാതെ റൈഫിൾ മാത്രം: 3.6 കി.ഗ്രാം
  • കാലി മാഗസിന്റെ കൂടെ: 3.69 കി.ഗ്രാം
  • നിറച്ച മാഗസിന്റെ കൂടെ റൈഫിൾ: 4.1 കി.ഗ്രാം
  • മടക്കിയ ബട്ടിന്റെ (foldable butt) കൂടെ: 3.2 കി.ഗ്രാം
  • മാഗസിന്റെ ഭാരം: 90 ഗ്രാം
  • ബയണറ്റിന്റെ ഭാരം: 170 ഗ്രാം

നീളം:
  • ഉറപ്പിച്ച ബട്ടിനോടൊപ്പം(Fixed Butt) റൈഫിളിന്റെ നീളം: 960 മി.മീ.
  • ബയണറ്റിനൊപ്പം റൈഫിളിന്റെ നീളം: 1110 എം.എം
  • ബാരലിന്റെ നീളം: 464 എം.എം.
  • സൈറ്റ് റേഡിയസ്: 407എം.എം
  • ഫോൾഡഡ് ബട്ടിന്റെ കൂടെ റൈഫിളിന്റെ നീളം: 750 എം.എം.
  • നിവർത്തിയ ബട്ടിന്റെ കൂടെ റൈഫിളിന്റെ നീളം: 950 എം.എം
  • ഫോൾഡഡ് ബട്ടിന്റെ നീളം: 200എം.എം
  • ബയണറ്റിന്റെ നീളം: 205 എം.എം.
  • ബയണറ്റിന്റെ തരം: മൾട്ടിപർപ്പസ്
  • നിറച്ച മാഗസിന്റെ ഭാരം: 340 ഗ്രാം

റേറ്റ് ഓഫ് ഫയർ:
  • നോർമ്മൽ: 60 റൗണ്ട്/മിനിറ്റ്
  • ബ്രസ്റ്റ്: 90 റൗണ്ട്/മിനിറ്റ്
  • റാപ്പിഡ്: 150 റൗണ്ട്/മിനിറ്റ്

വിമർശനങ്ങൾ
  • ഇതൊക്കെയാണെങ്കിലും സിയാചിനും കാർഗിലും പോലുള്ള കൊടുംതണുപ്പ് മേഖലകളിൽ ഇൻസാസിന്റെ പ്രവർത്തനം പരാജയമാണെന്ന് വാദിക്കുന്നവരുണ്ട്.
  • കനംകുറയ്ക്കാനായി പോളിമർ കൊണ്ടുണ്ടാക്കിയ ബട്ട്, എളുപ്പം പൊട്ടിപ്പോകാവുന്ന ക്യാരിയിംഗ് ഹാന്റിൽ, ചെയ്ഞ്ച് ലിവർ സിസ്റ്റം തുടങ്ങിയവ ഇൻസാസിന്റെ കുറവുകളായി പരാമർശിക്കപ്പെടുന്നു.[7]

ഉപയോഗിക്കുന്ന രാജ്യങ്ങൾ
  •  ഭൂട്ടാൻ: റോയൽ ഭൂട്ടാൻ ആർമി.
  •  ഇന്ത്യ: അസ്സാൾട്ട് റൈഫിളും എൽ.എം.ജിയും ഇന്ത്യൻ സൈന്യവും ഇന്ത്യൻ അർദ്ധസൈന്യവും ഉപയോഗിക്കുന്നു.[8] [9]
  •  നേപ്പാൾ: 23,000 ഇൻസാസ് റൈഫിളുകൾ ഇന്ത്യ നേപ്പാളീസ് ആർമിയ്ക്ക് 70% വിലക്കുറവിൽ നൽകി.
  •  ഒമാൻ: റോയൽ ആർമി ഓഫ് ഒമാൻ[10]

അവലംബം
  1. ഓർഡിനൻസ് ഫാക്ടറി, തിരുച്ചിറപ്പള്ളി,ഇഷാപ്പൂർ റൈഫൈൾ ഫാക്ടറി,സ്മോൾ ആംസ് ഫാക്ടറി, കാൺപൂർ എന്നിവയുടെ കൂട്ടായ്മ
  2. "INSAS-weary army shops for new infantry arms". The New Indian Express. 02 ഒക്ടോബർ 2015. Check date values in: |date= (help)
  3. R. Blake Stevens, The FAL Rifle, Classic Edition, Collector Grade Publications, Canada
  4. ആർമമെന്റ് റിസർച്ച് ആന്റ് ഡെവലപ്‌മെന്റ് എസ്റ്റബ്ലിഷ്‌മെന്റ്
  5. ENCYCLOPEDIA OF EXPLOSIVES AND RELATED ITEMS. VOLUME 1
  6. Edward Clinton Ezell, Kalashnikov - The Arms and the Man, Collector Grade Publications, Canada
  7. വെബ്‌സൈറ്റ്, ടൈംസ് ഓഫ് ഇന്ത്യ (02 ഒക്ടോബർ 2015). "INSAS not performing to optimum level: Army". ടൈംസ് ഓഫ് ഇന്ത്യ. Check date values in: |date= (help)
  8. വെബ്‌സൈറ്റ്, വേൾഡ് ഗൺസ് (02 ഒക്ടോബർ 2015). "INSAS assault rifle (India)". വേൾഡ് ഗൺസ്. Check date values in: |date= (help)
  9. Hogg, Ian (2002). Jane's Guns Recognition Guide. Jane's Information Group. ISBN 0-00-712760-X.
  10. വെബ്‌സൈറ്റ്, ഹിന്ദുസ്ഥാൻ ടൈംസ് (02 ഒക്ടോബർ 2015). "Oman army all set to use India's INSAS rifles". ഹിന്ദുസ്ഥാൻ ടൈംസ്. Check date values in: |date= (help)

പുറത്തേക്കുള്ള കണ്ണികൾ


This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.