جنگ باجوڑ

اگست 2008 کے اوائل میں فرنٹیئر کور نے لوئی سام کے قصبے کے نزدیک ایک چوکی لنے کے نظام سنبھالنے کے لیے ایک چوکی بنائی۔ یہاں سے سرحد عبور کی جاتی تھی۔ کھر سے 12 کلومیٹر دور اس جگہ پر جو باجوڑ ایجنسی کا انتظامی صدر مقام ہے، پر تحریکِ طالبان کے حامی جنگجوؤں کا قبضہ تھا۔ افغانستان کے کنڑ صوبے جانے کے لیے لوئی سام کی کلیدی اہمیت ہے۔ ایف سی کے ان ڈیڑھ سو جوانوں کو سینکڑوں طالبانوں نے گھیرے میں لے لیا اور خونریز جنگ شروع ہو گئی۔ تین دن کی جنگ کے بعد ایف سی کے جوان کھر پہنچنے میں کامیاب ہو گئے۔ بظاہر طالبان نے معرکہ مار لیا تھا۔

تاہم کئی دن بعد ایف سی نے میجر جنرل طارق خان کی سربراہی میں ایک بڑا حملہ شروع کر دیا جس کا نام آپریشن شیر دل رکھا گیا تھا۔ اس آپریشن کا مقصد باجوڑ پر سے طالبان کے قبضے کو ختم کرنا تھا۔ ایف سی اور پاکستانی فوج کے 8,000 جوان اس میں شریک ہوئے۔ ان کی مدد کے لیے کوبرا اٹیک ہیلی کاپٹر اور جیٹ طیارے موجود تھے جنہوں نے طالبان کی کمین گاہوں پر بمباری کی۔ پاکستانی فوج کی مدد کے لیے ہوائی فوج نے انتہائی جارحانہ انداز میں حملے جاری رکھے۔ پاکستان کے فوجی ذرائع کے مطابق پاکستانی فوج طالبان کی مزاحمت کی شدت سے حیران ہو گئی۔ طالبان انتہائی جدید حکمتِ عملی سے پہلے سے محفوظ کیے گئے مورچوں سے مزاحمت کر رہے تھے۔

اس سال کے اختتام تک پاکستانی فوج نے 1,000 سے زیادہ جنگجوؤں کی ہلاکت کا دعوٰی کیا جن میں القائدہ کا مقامی رہنما مصر کا باشندہ ابو سعید المصری بھی شامل تھا۔ فوج کے 82 جوان شہید ہوئے۔ پاکستانی فوج نے طالبان کے خلاف مقامی قبائل کو بھی لشکر بنانے کا کہا تاکہ وہ فوج کے شانہ بشانہ لڑائی میں حصہ لے سکیں۔ سالار زئی قبائل نے 4,000 مسلح جوانوں پر مشتمل لشکر بنایا اور فوج کے ساتھ لڑائی میں حصہ لینے پہنچ گئے۔ 7 اکتوبر کو سالار زئی کے زعماء نے اعلان کیا کہ ان کا علاقہ طالبان سے پاک ہو چکا ہے اور فوج آ کر یہاں کا انتظام سنبھال سکتی ہے۔

کئی ذرائع کے مطابق اسلام آباد میں میرئٹ ہوٹل پر ہونے والا 20 ستمبر کا حملہ بظاہر طالبان نے باجوڑ کی لڑائی کا بدلہ لینے کے لیے کیا تھا۔

8 اکتوبر کو پارلیمان میں دی جانے والی بریفنگ کے بعد فوج نے اعلان کیا کہ 321 غیر ملکیوں سمیت کل 2,744 جنگجو مارے گئے ہیں جبکہ 1,400 سے زیادہ زخمی جنگجو ملک بھر سے گرفتار ہوئے ہیں۔ 25 اکتوبر کو پاکستانی فوج نے اعلان کیا کہ انہوں نے لوئی سام کو طالبان سے چھڑ الیا ہے۔ 25 اکتوبر تک باجوڑ میں 500 مسلح جنگجو مارے گئے۔ 2008 کے اختتام تک فوج نے تورغدئی، نواگئی، اتمان خیل اور سالا رزئی کے علاقے کا نظام سنبھال لیا تھا۔ 2009 کے وسط تک ماموند اور چہرمنگ کی وادیوں کا انتظام بھی فوج کے پاس آ چکا تھا۔ فروری 2010 میں تازہ دستوں کی مدد سے ڈمہ ڈولہ کے مشکل علاقے سے مسلح جنگجوؤں کے چھوٹے چھوٹے گروہوں سے لڑائی جاری رہی اور مارچ 2010 میں باجوڑ کو طالبان سے چھڑ الیا گیا۔ اس آپریشن کے اختتام پر ڈھیروں جنگجوؤں نے ہتھیار ڈال دیے اور سرچ آپریشن شروع ہو گئے۔

اس لڑائی کو پاکستان کی طرف سے طالبان کے خلاف جنگ کا فیصلہ کن موڑ سمجھا جاتا ہے۔ فوجی حکام کے مطابق اس جنگ سے دوسرے قبائل کی قسمت کا فیصلہ بھی ہو سکتا تھا۔ ان کے بقول وزیرستان کے باہر باجوڑ میں طالبان سب سے اہم اور مضبوط مرکز بن سکتا تھا۔ اس لڑائی میں شریک ہونے کے لیے افغانستان سے بھی طالبان پہنچے جس کی وجہ سے بین الاقوامی فوج کو افغانستان میں کچھ آسانی ہوئی۔

28 فروری 2009 کو سیکورٹی فورسز نے بالآخر طالبان اور دیگر اسلامی گروہوں کو باجوڑ میں شکست دے دی جو افغان سرحد کے پاس ہونے کی وجہ سے کلیدی اہمیت رکھتا تھا۔ میجر جنرل طارق خان جو سات میں سے پانچ ایجنسیوں میں ہونے والے آپریشن کے سربراہ تھے، نے کہا کہ فوج اور ایف سی نے باجوڑ میں زیادہ تر جنگجوؤں کو ختم کر دیا ہے۔ باجوڑ رقبے کے لحاظ سے سب سے چھوٹی لیکن افغانستان جانے کے لیے اہم ترین راستہ ہے۔ یہ آپریشن چھ ماہ جاری رہا اور فوج اور ایف سی نے 1,500 سے زیادہ جنگجو ہلاک کیے جبکہ ان کے اپنے 97 فوجی شہید اور 404 شدید زخمی ہوئے۔