ایشور چندر ودیاساگر

ایشور چندر بندھوپادھیائے ایک ہندو برہمن خاندان میں 26 ستمبر 1820ء کو پچھم مدناپور ضلع کی ذیلی تقسیم گھاٹل میں واقع برسنگھا گاؤں میں پیدا ہوئے۔ ان کے والد کا نام ٹھاکر داس بندھوپادھیائے اور والدہ کا نام بھگوتی دیوی تھا۔ چھ برس کی عمر میں ایشور چندر کلکتہ چلے گئے جہاں وہ بڑا بازار میں بھاگوت چرن کے گھر رہا کرتے تھے، اس گھر میں ان کے والد ٹھاکر داس نے بھی برسوں قیام کیا تھا۔ ایشور چندر بہت جلد بھاگوت کے خاندان سے گھل مل گئے۔ بھاگوت کی سب سے چھوٹی بیٹی رائے مونی کی ممتا بھری محبت نے انہیں بہت زیادہ متاثر کیا اور ہندوستان میں خواتین کی حالت زار کی اصلاح کے تئیں ان کے انقلابی کاموں میں رائے مونی کا زبردست تاثر صاف جھلکتا ہے۔

گھر میں روشنی کا بندوبست نہ ہونے کے باوجود انہیں علم حاصل کرنے کا اتنا زیادہ شوق تھا کہ وہ سڑک پر کھمبے کی روشنی میں پڑھا کرتے تھے۔[8] انہوں نے تمام امتحانات میں نمایاں انداز سے کامیابی حاصل کی۔ انہیں تعلیم کے دوران میں کئی مرتبہ وظائف بھی دیے گئے۔ ایشور چندر نے اپنی اور اپنے خاندان کی مدد کے لیے جوراشنکو میں جز وقتی استاد کے طور پر بھی ملازمت کی۔ ایشور چندر نے پھر سنسکرت کالج میں داخلہ لیا جو کلکتہ میں واقع ہے اور بارہ سال کی تعلیم کے بعد فارغ التحصیل ہوئے اور سنسکرت کی گرائمر، ادب، لہجے، ویدانت، اسمرتی اور فلکیات کی تعلیم مکمل کی۔[9] اُس دور کی روایت کے مطابق ایشور چندر چودہ سال کی عمر میں ازدواجی بندھن میں بندھ گئے۔ ان کی بیوی کا نام دینا مانی دیوی تھا۔ نرائن چندر بندو پادھیا ان کی واحد اولاد تھی۔

1839ء میں ایشور چندر نے وکالت کا امتحان پاس کر لیا۔ 1841ء میں 21 سال کی عمر میں انہوں نے فورٹ ولیم کالج میں شمولیت اختیار کی اور شعبہ سنسکرت کے صدر کلرک بنے۔[10]

ودیا ساگر نے باریشا ہائی سکول کو 1856 میں کلکتہ میں کھولا۔

ودیاساگر نے ہندوستان میں خواتین کی بہتری کے لیے بہت کام کیا اور ان کا زیادہ تر زور ان کے آبائی علاقے بنگال پر مرکوز تھا۔ دیگر مصلحین کے برعکس آپ نے معاشرے کے اندر سے بہتری لانے کی کوشش کی۔

اکشے کمار دتہ جیسے لوگوں کی مدد سے ودیاساگر نے ہندو معاشرت میں بیواؤں کی دوسری شادی کی روایت قائم کی۔ کولن برہمن نظام میں مردوں کو عمر رسیدہ اور بعض اوقات بسترِ مرگ پر پڑے بندوں کو بھی ایک سے زیادہ شادیوں کی اجازت ہوتی تھی تاکہ وہ کم عمر، بعض اوقات نابالغ لڑکیوں سے بھی شادی کر کے ان کے والدین کو اس بدنامی سے بچا سکیں کہ ان کی بچی ان کے گھر ہی جوان ہوئی ہے۔ شادی کے بعد اور عموماً بیوہ ہونے کے بعد یہ لڑکیاں اپنے والدین کے گھر ہی چھوڑی دی جاتی تھیں۔ ایسی لڑکیوں اور خواتین کے نصیب میں اکثر فاقے، گھر کے سارے کام کاج کا بوجھ اور گھر سے باہر نکلنے پر سخت پابندی ہوتی تھی تاکہ انہیں کوئی اجنبی نہ دیکھ سکے۔

ایسے برے سلوک کی وجہ سے اکثر ایسی لڑکیاں گھر سے بھاگ کر طوائف بن جاتی تھیں تاکہ اپنا گزارا چلا سکیں۔ شومئی قسمت سے شہر کی معاشی خوش حالی اور شان و شوکت کے پیچھے ایسی کئی خواتین کا اہم کردار تھا جو اپنے گھر سے بھاگ کر اس پیشے میں داخل ہوئیں۔اندازہ ہ کہ کلکتہ میں 1853 میں کل 12،718 طوائفیں تھیں۔ بہت سی عورتیں بیوہ ہونے کے بعد سر کے بال مونڈ کر سفید ساڑھی زیبِ تن کر لیتی تھیں تاکہ مردوں کی بری نظروں سے بچ سکیں۔ ان کی قابلِ رحم حالت کی وجہ سے ودیاسار کو تبدیلی کا خیال آیا۔

آپ نے بنگلہ حروفِ تہجی کی اصلاح کی اور آسان بنگلہ حروف متعارف کرائے۔ اس کے تحت کل 12 واؤل اور چالیس عام حروف بنے۔ اس طرح سنسکرت کے کچھ حروف اور علامات نکل گئیں اور اس کی جگہ کچھ نئے حروف آ گئے جو اعراب کا کام دینے لگے۔ اس کے علاوہ انہوں نے بنگلہ اور سنسکرت ادب کے لیے بورنو پوریچوئے (حروف کی پہچان) نامی کتاب لکھی جو بہت کارآمد سمجھی جاتی ہے۔

ودیا ساگر کی تصانیف حسب ذیل ہے:

• بیتال پنچابنستی (1847)
• بنگلہ اتہاس (1848)
• جیبانچارت (1850)
• بدھادوئے (1851)
• اوپاکرمانیکا (1851)
• بورنو پوریچوئے (1854)
• کوٹھا مالا (1860)
• ستار بونوباس (1860)
• بنگالی اخبار – شوم پرکاش نے 1858ء میں اشاعت شروع کی۔

ودیا ساگر اگرچہ بنیاد پرست ہندو برہمن خاندان سے تھے مگر انہوں نے اپنی ظاہری شکل و صورت بہت آزادانہ رکھی۔ اس کے علاوہ ان پر مشرقی خیالات اور نظریات کا کافی اثر تھا اور اعلٰی تعلیم یافتہ بھی تھے۔ رام کرشن تعلیم یافتہ نہیں تھے لیکن دونوں میں بہت اچھا تعلق قائم ہو گیا۔ جب دونوں کی ملاقات ہوئی تو رام کرشن نے ودیا ساگر کی ذہانت کی تعریف کی اور انہیں "بحر علم" سے تعبیر کیا۔ ودیا ساگر نے جواباً مذاق کرتے ہوئے کہا کہ کاش رام کرشن سمندر سے کچھ نمکین پانی حاصل کر لیتے۔ رام کرشن نے ادب اور عاجزی سے جواب دیا سمندر کا پانی نمکین سہی مگر علم کا سمندر نمکین نہیں۔[11]

ودیا ساگر کی وفات کے بعد رابندر ناتھ ٹیگور نے ان کے بارے میں لکھا: "معلوم نہیں کہ کیسے خدا نے 4 کروڑ بنگالی بناتے ہوئے ایک انسان پیدا کر دیا"۔[12][13]

وفات کے بعد انہیں کئی مختلف طریقوں سے یاد رکھا جا رہا ہے جن میں سے کچھ درجِ ذیل ہیں:

1. ودیا ساگر سیتو نامی پُل دریائے ہوگلی پر بنایا گیا ہے جو بھارت کے صوبے مغربی بنگال میں واقع ہے۔ یہ ہاؤڑا شہر کو اس کے جڑواں شہر کلکتہ سے ملاتا ہے۔
2. ودیا ساگر میلہ ان کی یاد میں مغربی بنگال میں 1994ء سے منایا جاتا ہے جس میں ان کی طرف سے تعلیم عام کرنے کی کوششوں کی یاد تازہ کی جاتی ہے۔
3. ودیا ساگر کالج کلکتہ میں واقع ہے اور ودیا ساگر یونیورسٹی پچھم مدناپور میں ہے۔
4. ودیاساگر وسطی کلکتہ کی ایک سڑک ہے۔
5. مغربی بنگال کی حکومت نے ودیا ساگر کے نام سے ایک اسٹیڈیم بنایا ہے۔
6. ودیا ساگر ہال آف ریزیڈنس ایک فنی تعلیمی ادارہ ہے جو ان کے نام سے منسوب ہے۔
7. ودیاساگر اسٹیشن جھاڑ کھنڈ میں ان کے نام سے منسوب ہے۔
8. 1970ء اور 1998ء میں بھارتی ڈاک کے محکمے نے ان کے نام سے منسوب ڈاک ٹکٹ جاری کیے۔[14]

ویکی کومنز پر ایشور چندر ودیاساگر سے متعلق سمعی و بصری مواد ملاحظہ کریں۔

سانچہ:Americana Poster

• ایشور چندر ودیاساگر انٹرنیٹ آرکائیو پر
•  Romesh Chunder Dutt۔ "Vidyasagar, Iswar Chandra"۔ دائرۃ المعارف بریطانیکا (اشاعت 11ویں۔)۔
• www.americanchronicle.com