திருமழபாடி

அரியலூரில் இருந்து 28 கி மீ தொலைவிலும் தஞ்சாவூரில் இருந்தும் 28 கி மீ தொலைவிலும் அமைந்துள்ள இவ்வூர் கொள்ளிடம் ஆற்றின் வடகரையில் அமைந்துள்ளது.

"பொன்னார் மேனியனே" எனத் தொடங்கும் தேவாரப் பாடலின் இறுதி வரியில் வரும் "மண்ணே மாமணியே மழபாடியுள் மாணிக்கமே " எனக் குறிப்பிடப்படும் சிறப்புடைய இவ்வூர் வரலாற்றில் இடம்பெற்றுள்ள மிக முக்கியமான ஊர். இவ்வூரைச் சுற்றியும் கண்டராதித்தம், செம்பியக்குடி, அரண்மனைக் குறிச்சி, பாளையப் பாடி, குலமாணிக்கம் ஆகிய ஊர்கள் உள்ளன. சோழர் மரபில் வந்த கண்டராதித்தன் பெயரிலும், மழவர் குல மாணிக்கம் என அழைக்கப்பட்ட செம்பியன் மாதேவியின் பெயரிலும் அமைந்துள்ளவையே மேற்குறிப்பிடப்பட்டுள்ள ஊர்களின் பெயர்கள்.

இங்கு அரசு மேல் நிலைப்பள்ளி ஒன்றும் உள்ளது. இவ்வூரின் பேருந்து நிறுத்தம் அருகே 750 கிலோ எடையுள்ள திருவள்ளுவர் உருவ வெண்கலச் சிலை அமைக்கப்பெற்றுள்ளது.