குராசான்

குராசான் (பாரசீகம்: خراسان بزرگ, or خراسان کهن listen  ஆங்கிலம்:Khurasan) என்பது பாரசீக நாட்டின் வடகிழக்கில் உள்ள ஒரு வரலாற்றுப் பகுதி. தற்காலத்தில் பெரிய என்ற அடைமொழி இந்த வரலாற்றுப் பகுதியை பண்டைய குராசானின் மேற்குப் பகுதியாக இருந்த இன்றைய ஈரானில் உள்ள குராசான் மாகாணத்திலிருந்து வேறுபடுத்தி அறிய உதவுகின்றது.[1] பண்டைய இஸ்லாமிய காலத்தில் நடு ஆசியாவையும் ஆப்கானிஸ்தானையும் உள்ளடக்கிய ஒரு அகண்ட நிலப்பரப்பாக இருந்தது. தொடக்க இஸ்லாமிய காலத்தில் மேற்கு பாரசீகத்தின் கிழக்குப் பகுதியிலிருந்த எல்லா இடங்களையும் குராசான் என்று அழைத்தனர். அப்பகுதி சிந்து சமவெளி வரை ஒரு தெளிவற்ற முறையில் பரவியிருந்தது.[2]

கலீபாக்கள் காலத்தைய நிலப்பகுதிகளின் பெயர்கள் 750 C E.

குராசான் அதன் சரியான பொருளில் இப்போதைய ஆப்கானிஸ்தானிலுள்ள ஹெராத், பால்க், இப்போதைய வடகிழக்கு ஈரானில் உள்ள மஷ்ஷாத், நிஷப்பூர், இப்போதைய தெற்கு துர்க்மெனிஸ்தானில் உள்ள மெர்வ் மற்றும் நிஸா, இப்போதைய உஸ்பெகிஸ்தானில் உள்ள புகாரா, சமர்கந்து முதலிய நகரங்களை உள்ளடக்கிய நிலப்பரப்பாக இருந்தது. சில காலங்களில் இந்திய துணைக்கண்டம் வரை நீண்டு திரான்சோக்சியானாவின், சொக்தியானா, சிச்தான் பகுதிகளையும் உள்ளடக்கிதாக இருந்தது என்று நம்புகின்றனர். அராபியர்கள் தெற்கு இந்துகுஷ்ஷிற்கு வந்து சுன்பில்களைத் தோற்கடித்த போது இந்தப் பகுதியை அல் ஹிந்த் என அழைத்துள்ளனர்.

14 முதல் 16 ஆம் நூற்றாண்டு வரையான காலப்பகுதியில் இந்துகுஷ் மலைத்தொடரின் தெற்குப் பகுதி (ஸமிந்தவார், பலுச்சிஸ்தான், காபூலிஸ்தான்) குராசானுக்கும் இந்துஸ்தானத்திற்கும் எல்லையாக இருந்துள்ளது.[3]

இஸ்லாமிய காலத்தில் பாரசீக ஈராக்கும் குராசானும் முக்கிய மாகாணங்களாக இருந்துள்ளன. இந்த இரண்டு மாகாணங்களுக்கான எல்லையாக குர்கான் தாம்கான் கூமிஸ் நகரங்களைச் சுற்றியுள்ள பகுதிகள் இருந்துள்ளன. குறிப்பாக கஸ்நாவித், ஸெல்ஜுக், தைமுரிட் பரம்பரையினர் தங்கள் அரசுகளை ஈராக்கிய குராசானியப் பகுதிகளாகப் பிரித்துக்கொண்டனர்.