மெய் வளிமம்

மெய் வளிமம் (real gas) என்பது கருத்தியல் நிலையிலிருந்து விலகிச் செல்லும் வளிமம் ஆகும். இவ்விலகீட்டுக்குக் குறிப்பாக இரண்டு காரணிகள் உள்ளன. 1) அழுத்தம் அதிகரிக்க அதிகரிக்க, வளிமத்தின் கன அளவு குறைந்து கொண்டே சென்று ஒரு கட்டத்தில் சுழியத்தை எட்டும் என்கிறது கருத்தியல் விதி. ஆனால், வளிம மூலக்கூறுகளின் இருப்பாலும், ஒரு கட்டத்துக்கு மேல் அமுக்க இயலாது என்பதாலும், இக்கன அளவு மிகவும் சிறியதானாலும், அது எப்போதும் சுழியமாகாது. 2) உயர் வெப்பநிலைகளில் மூலக்கூற்று இடைவிசை அதிகம் இராது என்றாலும், குறைந்த வெப்பநிலைகளில் இவ்விசை நிச்சயமாக இருக்கும்.

மெய் வளிமங்களை நன்கு புரிந்துகொள்ள, பின்வரும் கருத்துகளை அறிந்திருக்க வேண்டும்.

• அமுங்குமைத் தாக்கங்கள்;
• மாறும் தன்வெப்பக் கொண்மை;
• வான் டெர் வால்ஸ் விசை;
• சமநிலையல்லா வெப்ப இயக்கவியல் தன்மைகள்;

பெரும்பாலான பயன்பாடுகளுக்கு, கருத்தியலில் இருந்து இவ்வேறுபாடு தேவையற்ற ஒன்று என்று பொருட்படுத்தாமல் இருந்துவிடலாம். கருத்தியல் வளிமம் என்பதே போதுமானது. ஆனால், வளிமங்களின் உறைநிலை அருகிலோ, உயர் அழுத்தங்களிலோ, மாறுநிலைப் புள்ளிகளுக்கு அருகிலோ, ஜூல்-தாம்சன் விளைவு போன்றவற்றை விவரிக்கவோ, மெய் வளிமத்தைப் பயன்படுத்த வேண்டியிருக்கும். கருத்தியல் நிலையிலிருந்து விலகீட்டை அமுங்குமைக் காரணி Z கொண்டு குறிக்கலாம்.