ಯುನೈಟೆಡ್ ಅರಬ್ ಎಮಿರೇಟ್ಸ್

1971ರ ವರೆಗೆ ಈ ದೇಶಗಳು ಬ್ರಿಟನ್ನಿನ ರಕ್ಷಣೆಯಲ್ಲಿದ್ದು ಇವನ್ನು ಟ್ರೂಷಿಯಲ್ ದೇಶಗಳೆಂದು ಕರೆಯಲಾಗುತ್ತಿತ್ತು. 1971ರ ಅನಂತರ ಇವು ಸರ್ವತಂತ್ರ ಸ್ವತಂತ್ರ ದೇಶಗಳಾಗಿ ಒಕ್ಕೂಟ ರಚಿಸಿಕೊಂಡವು. ಈ ಏಳು ಅರಬ್ ದೇಶಗಳು ಪ್ರತ್ಯೇಕವಾಗಿ ತಮ್ಮವದೇ ಆದ ಅಮೀರನೊಬ್ಬನ ಆಡಳಿತಕ್ಕೆ ಒಳಪಟ್ಟಿರುತ್ತದೆ. ಈ ಅಮೀರ ಆ ದೇಶದ ಒಳಾಡಳಿತವನ್ನು ನಿಯಂತ್ರಿಸುತ್ತಾನೆ. ಏಳು ದೇಶಗಳ ಏಳುಮಂದಿ ಅಮೀರರು ಸೇರಿ ಒಬ್ಬ ಅಧ್ಯಕ್ಷನನ್ನು ಆರಿಸಿ ಈ ಒಕ್ಕೂಟದ ಸಂಯುಕ್ತ ರಕ್ಷಣೆ, ವಿದೇಶಿ ನೀತಿ ಮುಂತಾದವು ಇವನ ಅಧೀನಕ್ಕೆ ಸೇರಿರುತ್ತವೆ. 25 ಮಂದಿ ಮಂತ್ರಿಗಳ ಸಭೆ ಈ ದೇಶಾಡಳಿತವನ್ನು ಗಮನಿಸುತ್ತದೆ .

ತೈಲದಿಂದ ಬರುವ ಅಪಾರ ಆದಾಯವನ್ನು ದೇಶದಲ್ಲಿ ಹೊಸ ಶಾಲೆಗಳ ನಿರ್ಮಾಣಕ್ಕೆ, ಆಸ್ಪತ್ರೆಗಳ, ಹೊಸಮಾರ್ಗಗಳ, ನಿವೇಶನಗಳ, ವಸತಿಗೃಹಗಳ ನಿರ್ಮಾಣಕ್ಕೆ ಉಪಯೋಗಿಸಿ ದೇಶಕ್ಕೆ ಹೊಸರೂಪವನ್ನೆ ನೀಡಲಾಗಿದೆ. ಜನರ ಸೌಕರ್ಯ ಅಭಿವೃದ್ಧಿಯಾಗಿದೆ. 6 ರಿಂದ 12 ವರ್ಷದೊಳಗಿನ ಮಕ್ಕಳಿಗೆ ಶಾಲಾಶಿಕ್ಷಣ ಕಡ್ಡಾಯ. ವಿಶಾಲವಾದ ಮರಳು ಭೂಮಿಯಲ್ಲಿ ನೀರಿನ ಬಾವಿಗಳು, ಒಯಸಿಸ್‍ಗಳು ಇವೆ. ಕಚ್ಚಾತೈಲವನ್ನೇ ವಿದೇಶಗಳಿಗೆ ರಫ್ತುಮಾಡಿ ತಮಗೆ ಬೇಕಾದ ಕಟ್ಟಡ ಸಾಮಗ್ರಿ, ಬಟ್ಟೆಗಳು, ಆಹಾರವಸ್ತುಗಳು, ವಿವಿಧ ಯಂತ್ರೊಪಕರಣಗಳನ್ನು ಆಮದು ಮಾಡಿಕೊಳ್ಳುತ್ತಾರೆ.

ಈ ಒಕ್ಕೂಟದ ವಿಸ್ತೀರ್ಣ 83,600 ಚ.ಕಿಮೀ. ಜನಸಂಖ್ಯೆ 26,03,000.

ಇದರ ಭೂಭಾಗ ಸಮತಟ್ಟಾಗಿದೆ. ಕರಾವಳಿಯ ಮೈದಾನ ಒಳನಾಡಿನ ಮರುಭೂಮಿಯೊಂದಿಗೆ ಕೂಡುತ್ತದೆ. ಭೌಗೋಳಿಕವಾಗಿ ಇಲ್ಲಿ ಒಳನಾಡು ಪ್ರದೇಶ, ಮರುಭೂಮಿ, ಮತ್ತು ಕರಾವಳಿ ಎಂದು ಮೂರು ವಿಭಾಗಗಳಿವೆ.

ಇಲ್ಲಿ ಉಷ್ಣತೆ ಹೆಚ್ಚು. ಮಳೆ ಕಡಿಮೆ. ಕರಾವಳಿ ಹೆಚ್ಚು ಆದ್ರ್ರ. ಒಳನಾಡಿನ ಮರಳುಗಾಡು ಶುಷ್ಕ. ಪೂರ್ವಭಾಗದಲ್ಲಿ ತಂಪಾದ ವಾಯುಗುಣವಿದೆ. ಅಲ್ಲಿ ಸ್ವಲ್ಪ ಮಳೆಯಾಗುತ್ತದೆ. ಬೇಸಗೆಯ ಸರಾಸರಿ ಉಷ್ಣಾಂಶ 32°ಸೆ. ಕೆಲವೊಮ್ಮೆ ಇದು 49°ಸೆ. ವರೆಗೂ ಹೆಚ್ಚುವು ದುಂಟು. ಚಳಿಗಾಲದ ಸರಾಸರಿ ಉಷ್ಣಾಂಶ 16°ಸೆ. ಇಲ್ಲಿ ವಾರ್ಷಿಕ ಸರಾಸರಿ ಮಳೆ 13 ಸೆಂಮೀ ವರ್ಷವಿಡೀ ಬಿಸಿಲಿನ ತಾಪ ಇರುತ್ತದೆ.

ಇದು ಇಪ್ಪತ್ತನೆಯ ಶತಮಾನದ ಮಧ್ಯದವ ರೆಗೂ ಹಿಂದುಳಿದಿತ್ತು. ಮೀನುಗಾರಿಕೆ ಯೊಂದೇ ಆಗಿನ ಮುಖ್ಯ ಉದ್ಯೋಗ. ಆ ಶತಮಾನದ ಉತ್ತರಾರ್ಧದಲ್ಲಿ ತೈಲ ನಿಕ್ಷೇಪ ಪತ್ತೆಯಾದ ಮೇಲೆ ಇದು ಸಂಪದ್ಯುಕ್ತ ವೆನಿಸಿತು. ನಗರಗಳೂ ಆಧುನಿಕ ಕೈಗಾರಿಕೆಗಳೂ ಬೆಳೆದುವು. ಜನ ತೈಲ ಉದ್ದಿಮೆಗಳಲ್ಲಿ ಕೆಲಸಮಾಡಲು ಉದ್ಯೋಗ ಹೆಚ್ಚಿತು. 1970ರ ವೇಳೆಗೆ ಇದು ಪ್ರಪಂಚದ ಅಧಿಕ ವರಮಾನ ಪಡೆಯುವ ದೇಶಗಳ ಸಾಲಿಗೆ ಸೇರಿತು.

ಇಲ್ಲಿ ವ್ಯವಸಾಯಕ್ಕೆ ಯೋಗ್ಯವಾದ ಭೂಮಿ ಬಹಳ ಕಡಿಮೆ. ಒಟ್ಟು ಭೂಭಾಗದ ಕೇವಲ ಶೇ. 1 ರಷ್ಟು. ಇಲ್ಲಿನ ಮುಖ್ಯ ಆಹಾರ ಬೆಳೆಗಳು ತರಕಾರಿ ಮತ್ತು ಕಲ್ಲಂಗಡಿಹಣ್ಣು. ಮುಖ್ಯ ವಾಣಿಜ್ಯ ಬೆಳೆ ಖರ್ಜೂರ. ಪೆಟ್ರೋಲಿಯಂ ಮತ್ತು ನೈಸರ್ಗಿಕ ಅನಿಲ ಇಲ್ಲಿಯ ಮುಖ್ಯಸಂಪ ನ್ಮೂಲಗಳು. ಇಲ್ಲಿ ಶಾಖ ಥರ್ಮಲ್ ವಿದ್ಯುಚ್ಛಕ್ತಿಯನ್ನೂ ಉತ್ಪಾದಿಸಲಾಗುತ್ತದೆ.

ಇಲ್ಲಿಯ ಮುಖ್ಯ ಉದ್ದಿಮೆಗಳು ಮೀನುಗಾರಿಕೆ, ಪೆಟ್ರೋ-ರಾಸಾಯನಿಕಗಳು, ಕಟ್ಟಡ ಸಾಮಗ್ರಿಗಳ ಉತ್ಪಾದನೆ, ದೋಣಿ ನಿರ್ಮಾಣ, ಕರಕುಶಲವಸ್ತುಗಳ ತಯಾರಿಕೆ ಮತ್ತು ಮುತ್ತುಗಳ ಸಂಗ್ರಹ.

ಭೂ ಪ್ರದೇಶ ಮರುಭೂಮಿ ಯಿಂದ ಕೂಡಿರುವುದರಿಂದ ರೈಲುಮಾರ್ಗಗಳಿಲ್ಲ. ಸು. 2,000 ಕಿಮೀ ಹೆದ್ದಾರಿ, 1800 ಕಿಮೀ ಸಾಧಾರಣ ರಸ್ತೆ ಇವೆ.