شاہراہ فیصل

شاہراہ فیصل کو کراچی کی سفارتی سڑک ہونے کا اعزاز حاصل ہے۔ پہلے اس کا نام ڈرگ روڈ تھا۔ ہوٹل میٹروپول اور ہوٹل آواری ٹاور کے سنگم سے شروع ہونے والی یہ طویل سڑک کراچی ہوائی اڈے کے مشہور زمانہ اسٹار گیٹ پر ختم ہوتی ہے۔

اس سڑک پر باربرداری کے ٹرکوں اور جانوروں سے کھینچی جانے والی گاڑیوں کا داخلہ ممنوع ہے۔ اب یہ سڑک تقریبا سگنل فری کردی گئی ہے۔ اس شاہراہ پر سرکاری افسران، وزراء اور ارکان پارلیمنٹ جو عموما حفاظت کی آڑ میں نجی افواج کی نمائش کرتے چلنا پسند کرتے ہیں سائرن اور ہوٹر کا بے دریغ استعمال کرتے دیکھے جاسکتے ہیں۔ ان لوگوں کی آمدوفت ( جس کو عرف عام میں وی آئی پی مومنٹ کہا جاتا ہے) کے باعث ہونے والے بد ترین ٹریفک جام میں ایمبولینسوں کے پھنس جانے کے کئی افسوسناک واقعات پیش آچکے ہیں جن میں متعدد قیمتی جانیں ضائع ہوچکی ہیں۔