வடமொழியில் பத்தின் அடுக்குகள்

கணிதத்தில் ஒன்று, பத்து, நூறு, ஆயிரம், முதலியவை பத்து என்ற எண்ணின் முதல் நான்கு அடுக்குகளாகும். கிரேக்ககாலத்திய கணிதமுறையில் வடிவவியலிலும் இன்னும் சில கணிதப் பிரிவிலும் கணிசமான கண்டுபிடிப்புகள் இருந்தாலும், எண்களைக் குறிப்பதிலும், எண்களைப் பற்றி ஒருவருக்கொருவர் பரிமாறிக் கொள்வதிலும் ஒரு எளிதான குறிமானம் இந்தியாவில் முதலில் கண்டுபிடிக்கப்பட்டது. இதற்குப் பல நூற்றாண்டுகளுக்கு முன்பே, குறிப்பாக மகாபாரதம், இராமாயணம் முதலிய இதிகாசங்கள் தோன்றுமுன்பே, இந்திய ஆவணங்களில் எண் பத்தின் பதினேழு அடுக்குகளுக்குத் தனிப் பெயர்கள் பயன்படுத்தப் பட்டிருக்கின்றன. வடமொழியில் பத்தின் அடுக்குகளுக்குள்ள இப்பெயர்களைப் பட்டியலிடுகிறது, லீலாவதி என்ற கணிதநூல்.