நைதரசன் ஆக்சைடு

நைதரசன் ஆக்சைடு (Nitrogen Oxide) அல்லது நாக்சு (NOx) என்பது பொதுவாக நைட்ரசனும் ஆக்சிசனும் சேர்ந்து உருவாகும் நைட்ரசன் ஆக்சைடு சேர்மங்களின் சுருக்கப் பெயராகும். குறிப்பாக ஒரு நைட்ரசன் மூலக்கூறும் ஒன்றோ இரண்டோ ஆக்சிசன் மூலக்கூறும் சேர்ந்து உருவாகும் நைட்ரிக் ஆக்சைடு (NO) அல்லது நைட்ரசன் டை-ஆக்சைடு (NO₂) என்னும் வேதிச்சேர்மங்களே நாக்சு என்று வழங்கப்பெறும். இவை எரிப்புச் செலுத்தங்களில் (combustion processes), குறிப்பாக உயர்வெப்ப எரிப்புக்களின் போது உருவாகும் தன்மையுடையவை.

• 
  நைட்ரிக் ஆக்சைடு, NO
• 
  நைட்ரசன் டை-ஆக்சைடு, NO₂
• 
  நைட்ரசு ஆக்சைடு, N₂O
• 
  டை-நைட்ரசன் டிரை-ஆக்சைடு, N₂O₃
• 
  டை-நைட்ரசன் டெட்ரா-ஆக்சைடு, N₂O₄
• 
  டை-நைட்ரசன் பெண்டா-ஆக்சைடு, N₂O₅

இயல்சூழ் (ambient) வெப்ப நிலைகளில் காற்றிலே கலந்திருக்கும் நைட்ரசனும் ஆக்சிசனும் ஒன்றோடு ஒன்று பிணைவதில்லை. ஆனால் தான்நகர்ச்சி வண்டிகளில் உள்ளெரிப்பு எந்திரங்களில் காற்றும் எரிபொருளும் கலந்து எரியும்போது மிக அதிக வெப்பம் உருவாகி, அந்த உயர்வெப்ப நிலைகளில் நைட்ரசனும் ஆக்சிசனும் ஒன்றோடு ஒன்று வேதிவினையாற்றி இணைந்து பலவித நைட்ரசன் ஆக்சைடு சேர்மங்களை உருவாக்குகின்றன. அதனால், வாகன நெரிசல் அதிகம் இருக்கும் பெருநகர்ப்புறங்களில் காற்றில் இந்த நாக்சுச் சேர்மங்களின் கலப்பு அதிகமாக இருக்கும்.

நாக்சு மூலக்கூறுகளும் ஆவியாகும் கரிமச் சேர்வைகளும் சூரிய ஒளியில் வேதிவினையாற்றும்போது சூழல் மாசுபடுகிறது. குறிப்பாக வேனிற்காலங்களில் இந்தப் பிரச்சினை அதிகமாகி, ஆசுத்துமா உள்ளவர்களுக்கும், குழந்தைகளுக்கும், வயதானவர்களுக்கும், மூச்சுத் தொந்தரவுகளும், நுரையீரல் பாதிப்புகளும் ஏற்பட முதன்மைக் காரணிகளாகின்றன.

காற்றிலே கலந்திருக்கும் ஈரப்பதத்தினோடு வேதிவினையாற்றி அமில மழைக்கும் இவை காரணமாகின்றன. கீழ்க்கண்ட சமன்பாட்டின் மூலம் இந்த வேதி வினையைக் குறிக்கலாம்.

2NO₂ + H₂O → HNO₂ + HNO₃