த லொஸ்ட் வேர்ல்ட்: ஜுராசிக் பார்க்

நடு அமெரிக்கத் தீவான ஈஸ்லா நுப்லாரிலிருந்த ஜுராசிக் பார்க்கைத் தொன்மாக்கள் ஆக்கிரமித்து நான்காண்டுகள் கடந்துவிட்டன. இந்நிலையில் அருகமைத் தீவான ஈஸ்லா சோர்னாவுக்கு (Isla Sorna) தன் குடும்பத்தோடு விடுமுறையைக் கழிக்க வந்துள்ள கேத்தி போமேன் என்ற சிறுமியை காம்ப்ஸோக்னாதஸ் என்ற தொன்மாக்கள் தாக்கிக் காயப்படுத்துகின்றன. அச்சிறுமியின் பெற்றோர், இன்-ஜென் மரபியல் நிறுவனத்தின்மீது வழக்குத் தொடுக்கின்றனர். அதன் புதிய தலைவரும் ஹேமன்டின் மருமகனுமான பீட்டர் லுட்லோ, ஈஸ்லா சோர்னாவைப் பயன்படுத்தி நிதி இழப்புகளிலிருந்து அந்நிறுவனத்தை மீட்கத் திட்டமிடுகிறார்.

இதற்கிடையில் கணித வல்லுநர் இயான் மால்கம், ஹேமன்டை அவரது மாளிகையில் சந்திக்கிறார். ஈஸ்லா நுப்லாரிலிருந்த ஜுராசிக் பார்க் பூங்காவின் தொன்மாக்கள், முதலில் இன்-ஜென் நிறுவனத்தால் ஈஸ்லா சோர்னாவில் உருவாக்கப்பட்டன. அத்தீவு பல ஆண்டுகளுக்கு முன்பு ஏற்பட்ட ஒரு சூறாவளியின் போது கைவிடப்பட்டது என அவரிடம் ஹேமன்ட் விளக்குகிறார். மேலும் அத்தீவுக்கு ஒரு குழுவை அனுப்பி அங்குள்ள தொன்மாக்களை ஆவணப்படுத்தினால் அங்கு நிகழவிருக்கும் மனிதக் குறுக்கீடுக்கு எதிராக பொது ஆதரவைத் திரட்டவும் இன்-ஜென்னைத் தடுக்கவும் இயலும் என அவர் நம்புகிறார். அக்குழுவின் உறுப்பினரும் தன் தோழியுமான தொல்லுயிரியலாளர் சாரா ஹார்டிங் ஏற்கனவே அங்கு சென்றிருப்பதை அறியும் மால்கம் (அவரை மீட்டெடுக்கும் ஒரே நோக்கத்துடன்) ஈஸ்லா சோர்னாவுக்குச் செல்ல ஒப்புக்கொள்கிறார்.

பின்பு மால்கம் தனது அணியினரான எட்டி கார்ர் மற்றும் நிக் வான் ஓவென் ஆகியோரைச் சந்திக்கிறார். இவர்கள் ஈஸ்லா சோர்னாவை அடைந்தபின் ஹார்டிங்கைக் கண்டுபிடிக்கின்றனர். மேலும் அவர்கள், மால்கம்மின் மகளான கெல்லி, தங்களின் நடமாடும் டிரெய்லர் ஒன்றில் மறைந்து வந்துள்ளதையும் அறிகின்றனர். பின்னர் அவர்கள், அங்குள்ள தொன்மாக்களைச் சிறைப்பிடிக்க லுட்லோ தலைமையில் கூலிப்படையினர், வேட்டைக்காரர்கள் மற்றும் தொல்லுயிர் ஆய்வாளர்கள் அடங்கிய ஒரு இன்-ஜென் குழு வருவதைக் காண்கின்றனர்.

இதற்கிடையில், இன்-ஜென் குழுவின் தலைமை வேட்டைக்காரர் ரோலன்ட் டெம்போ, ஒரு ஆண் டைரனோசாரஸை (டி ரெக்ஸ்) அதன் குட்டியின் அழுகுரலைப் பயன்படுத்திக் கவரத் திட்டமிடுகிறார்.

அன்றிரவில் மால்கம் அணியினர் இன்-ஜென் முகாமுக்குள் இரகசியமாக நுழைகின்றனர். சிறைப்பிடிக்கப்பட்ட தொன்மாக்கள், சான் டியேகோ நகரில் புதிதாக முன்மொழியப்பட்ட தீம் பார்க்குக்குக் கொண்டு வரப்படும் என அவர்கள் அறிகின்றனர். இதனால் ஹார்டிங்கும் ஓவெனும் அங்கு கூண்டுகளில் அடைபட்டுள்ள தொன்மாக்களை விடுவிக்கின்றனர். அவ்விலங்குகள் அம் முகாமை முழுவதுமாக அழித்துவிடுகின்றன.

டி-ரெக்ஸ் குட்டியை மீட்கும் ஓவென், அதன் உடைந்த காலைச் சீர் செய்வதற்காக டிரெய்லருக்குக் கொண்டு வருகிறார். கெல்லியை எட்டியின் பாதுகாப்பில் விடும் மால்கம், டி ரெக்ஸ் குட்டி தன் பெற்றோரால் தேடப்படுவதை உணர்ந்து டிரெய்லருக்கு விரைகிறார். அவர் அங்கு சென்ற சிறிது நேரத்தில் பெற்றோர் ரெக்ஸ்கள் டிரெய்லரின் இருபுறமும் வெளிப்படுகின்றன. அவற்றிடம் குட்டி விடப்பட்டபின்னர் எதிர்பாராவிதமாக அவையிரண்டும் டிரெய்லரைத் தாக்கி அருகிலுள்ள குன்றின் விளிம்பிலிருந்து தள்ளிவிடுகின்றன.

விரைவில் அங்கு வரும் எட்டி, ஒரு SUV-ஐக் கொண்டு அந்த டிரெய்லரை விளிம்பின் மீது மீண்டும் இழுத்து நிறுத்த முயலுகையில் பெற்றோர் ரெக்ஸ்கள் திரும்பி வந்து அவரைக் கொன்று உண்கின்றன. இதன் விளைவாக டிரெய்லர், SUV இரண்டுமே குன்றிலிருந்து விழுந்துவிடுகின்றன. மால்கம், ஹார்டிங், ஓவென்,கெல்லி ஆகிய நால்வரும் இன்-ஜென் குழுவினரால் மீட்கப்படுகின்றனர். தங்களின் தளவாடங்கள் (தகவல் தொடர்பு சாதனங்கள் மற்றும் வாகனங்கள்) அனைத்தும் அழிந்துவிட்டதால் இரு குழுவினரும் இணைந்து அத்தீவிலுள்ள இன்-ஜென் வானொலி நிலையத்தை நோக்கி கால்நடையாகப் பயணிக்கின்றனர்.

ஹார்டிங்கின் மேலாடையில் இருந்த குட்டியின் இரத்த வாசனையை மோப்பம் பிடிக்கும் பெற்றோர் ரெக்ஸ்கள் அதனைப் பின்தொடர்ந்து மறுநாள் இரவில் அக் குழுவின் முகாமைக் கண்டுபிடித்துவிடுகின்றன. பெண் டி-ரெக்ஸானது அவர்களை ஒரு நீர்வீழ்ச்சி குகைக்குத் துரத்திச் செல்கிறது. இச்சமயத்தில் ரோலன்ட் டெம்போ, ஆண் டி ரெக்ஸுக்கு மயக்க மருந்து செலுத்துகிறார்.

இன்-ஜென் குழுவின் பிற உறுப்பினர்கள் ஒரு உயரமான புல்வெளியின் வழியாகத் தப்பிச் செல்கையில் வெலாசிராப்டர்களால் கொல்லப்படுகின்றனர். தலைநிலத்திலுள்ள இராணுவத்தை உதவிக்கு அழைக்கும் நோக்கத்துடன் ஓவென், இன்-ஜென் தொழிலாளர்கள் சிற்றூரிலுள்ள செய்தித்தொடர்பு மையத்துக்கு விரைகிறார். அவரைத் தொடர்ந்து சிறிது நேரத்தில் அங்கு வரும் மால்கம், ஹார்டிங், கெல்லி ஆகிய மூவரையும் வெலாசிராப்டர்கள் தாக்குகின்றன. அவ்விலங்குகளை ஒருவாறாக சமாளித்தபின் அவர்கள் அனைவரும் அங்கு வரும் உலங்கு வானூர்தியில் ஏறி ஈஸ்லா சோர்னாவை விட்டு வெளியேறுகின்றனர்.

ஆண் டி-ரெக்ஸை ஒரு சரக்குக் கப்பல், தலைநிலத்துக்கு அழைத்துச் செல்கிறது. ஆனால் அதிலுள்ள பிற தொன்மாக்கள் (அநேகமாக வெலாசிராப்டர்கள்) அதன் மாலுமிகளைக் கொன்று விடுவதால் அக் கப்பல், சான் டியேகோ கப்பல்துறையில் மோதி விபத்துக்குள்ளாகிறது. அக் கப்பலின் சரக்குக் கிடங்கைத் திறக்கும் காவலர் ஒருவர், தற்செயலாக டி-ரெக்ஸை விடுவித்துவிடுகிறார். அவ் விலங்கு நகருக்குள் புகுந்து பேரழிவை விளைவிக்கிறது.

மால்கம்மும் ஹார்டிங்கும் டி ரெக்ஸ் குட்டியை ஒரு பாதுகாப்பான இன்-ஜென் கட்டிடத்தில் இருந்து மீட்டெடுத்து, பெரிய டி-ரெக்ஸை மீண்டும் கப்பலுக்குள் கவர்வதற்காகப் பயன்படுத்துகின்றனர். இச்செயலில் குறுக்கிட முயலும் லுட்லோவைப் பெரிய டி-ரெக்ஸ் சரக்குக் கிடங்கினுள் சிறைப்பிடிக்கிறது. பிறகு அவர் குட்டியினால் கொல்லப்படுகிறார். பெரிய டி-ரெக்ஸ் மீண்டும் தப்புமுன் ஹார்டிங் அதற்கு மயக்க மருந்து செலுத்துகிறார். பின்பு மால்கம் கிடங்கை மூடுகிறார்.

அவ்விலங்குகள் மீண்டும் ஈஸ்லா சோர்னாவுக்கு அழைத்துச் செல்லப்படுகின்றன. இதனைத் தொடர்ந்து ஒரு தொலைக்காட்சி நிகழ்ச்சியில் பேசும் ஹேமன்ட், அமெரிக்க மற்றும் கோஸ்டா ரிக்க அரசுகள் ஈஸ்லா சோர்னாவை ஒரு இயற்கைக் காப்பகமாகப் பராமரிக்க ஒப்புக்கொண்டுள்ளதாக அறிவிக்கிறார். மேலும் வாழ்க்கை, சமாளித்துக்கொள்ளும் (life will find a way) எனக் கூறி முடிக்கிறார்.

முதன்மைக் கட்டுரை: ஜுராசிக் பார்க் திரைப்படத் தொடரில் தோன்றிய கதாபாத்திரங்களின் பட்டியல்