கார்பமைடுப் பேரொட்சைடு

கார்பமைடுப் பேரொட்சைடு (Carbamide peroxide) என்பது, ஒரு ஒட்சியேற்று பொருள். இது, ஐதரசன் பேரொட்சைடு, யூரியா ஆகியவற்றின் கூட்டு விளைபொருள் ஆகும். இதன் மூலக்கூற்றுக் குறியீடு CH₆N₂O₃, அல்லது CH₄N₂O.H₂O₂. இது ஒரு வெண்ணிறப் பளிங்குருவான திண்மம். நீருடன் சேரும்போது ஒட்சிசனை வெளிவிடுகின்றது.

இந்த வேதிப்பொருள், தோல், கண், மூச்சுத் தொகுதி போன்றவற்றில் நமைச்சலை ஏற்படுத்தக்கூடியது. அத்துடன், அரிப்புத்தன்மை கொண்ட இது, எரிகாயங்களையும் ஏற்படுத்தக்கூடியது. 10% வரை செறிவு (3% ஐதரசன் பேரொட்சைடுக்கு ஈடானது) கொண்ட இப் பொருளினால் பாதிப்பு இல்லை. ஆனால் 35% செறிவுக்கு (12% ஐதரசன் பேரொட்சைடுக்கு ஈடானது) மேல் தோலில் வெண்ணிற வேதி எரிகாயங்களை ஏற்படுத்தும்.

தூய கார்பமைடுப் பேரொட்சைடு வெண் பளிங்குரு, அல்லது வெண் பளிங்குருப் பொடி வடிவம் கொண்டது. இது ஓரளவு நீரிற் கரையும் தன்மை (0.05 கி/மிலீ) கொண்டது.[1]