తి.తి.దే. పధకాలు

శ్రీనివాసునికి జరుగు నిత్య పుష్పాలంకరణ సేవలో పాల్గొన కోరు భక్తులు దేవస్థానం ఎగ్జిక్యూటివ్ ఆఫీసరు పేరిట డిమాండు డ్రాఫ్టు తీసి వారి అభీష్టానుసారం వేయి రూపాయలు మొదలుకొని లక్ష రూపాయల వరకు డబ్బు పంపినచో ఆ డబ్బును డిపాజిట్టు చేసి ఆ డబ్బుతో అత్యాధునిక గ్రీన్ హౌస్ కల్టివేషన్ పద్ధతులలో సువాసన కలిగిన పుష్పములు (గులాబి, చేమంతి, గన్నేరు, తామర, మల్లి, బంతిపూలు, మొగిలి, మొల్లలు, జాజులు, మరువము, దవణము, కనకాంబరాలు, నూరు వరహాలు) తిరుమల ఉద్యానవనములలో పెంచి భక్తులు కోరిన రోజు శ్రీవారికి పుష్పమాలలు వారి పేరుమీద సమర్పించబడును.

భక్తులు తమ శ్రీవారి దర్శనానికి తిరుమల వచ్చునప్పుడు వారే తమ కిష్టమైన విడి పుష్పములను 5 కిలోగ్రాములకు తగ్గకుండా ఎన్నైనా తెచ్చి తిరుమల గార్డెన్ ఆఫీసులో ఇచ్చి రసీదు పొందవచ్చును. ఆ పుష్పాలు ఆలయ అవసరాలకు తగినట్టు కట్టి ఆ భక్తుల పేరుమీద శ్రీవారికి కైంకర్యము చేయబడును.

పూదోట యజమానులు తాము పండించిన సీజను పుష్పాలను దేవుని పేర నేరుగా వారి ప్రాంతం నుండి తిరుమలకు బస్సులో పంపవచ్చును. దీనికి ఎ.పి.ఎస్.ఆర్.టి.సి.వారు ఉచిత బస్సు సౌకర్యం కల్పించినారు. అలా వచ్చిన పూలను తిరుమల గార్డెన్ ఆఫీసువారు తీసుకుని శ్రీ వేంకటేశునికి వినియోగిస్తారు. నర్సరీ యజమానులు తాము రూపొందించిన హైబ్రీడు పుష్పజాతి మొక్కలను తిరుమల దేవునికి సమర్పించిన అవి శ్రీవారి ఉద్యానవనాలలో పెంచబడి వాని పుష్పములు శ్రీవారికి కైంకర్యము చేయబడును.