ஹெக்டர் பேர்லியோஸ்

பேர்லியோஸ் பிரான்ஸ் நாட்டில், இசேயர் (Isère) பிரிவில், லையன் (Lyon) என்னும் இடத்துக்கு அண்மையில் உள்ள லா கோட்-சான் ஆண்ட்ரே (La Côte-Saint-André) என்னும் இடத்தில் பிறந்தார். இவரது தந்தை மாகாண மருத்துவரும், அறிஞரும் ஆவார். இளம் வயதில் பேர்லியோசின் கல்வி பெரும்பாலும் இவர் மூலமே கிடைத்தது. தந்தை தாராண்மை நோக்குக் கொண்ட ஒரு இறைமறுப்பாளர். தாயார் பழமைவாத ரோமன் கத்தோலிக்கர். இவருடன் சேர்த்துக் குடும்பத்தில் ஆறு பிள்ளைகள் பிறந்தாலும் மூவர் சிறு வயதிலேயே இறந்து விட்டனர். ஏனைய இருவரான நான்சியும், அடேலும் வாழ்க்கை முழுதும் ஹெக்டருக்கு நெருக்கமானவர்களாகவே இருந்தனர்.

அக்காலத்து இசையமைப்பாளர்கள் பலர் இளவயது மேதைகளாக இருந்தனர். ஆனால் பேர்லியோஸ் அவ்வாறானவர் அல்ல. தனது 12 ஆவது வயதிலேயே இவர் இசை கற்கத் தொடங்கினார். இவரது தந்தை விரும்பாததால் இவர் பியானோ கற்றுக்கொள்ளவில்லை. இதில் நன்மை தீமை இரண்டும் கலந்திருந்ததாக பேர்லியோஸ் பிற்காலத்தில் குறிப்பிட்டுள்ளார். இவர் கிட்டார், புல்லாங்குழல் ஆகியவற்றைக் கற்றுத் திறமையுள்ளவர் ஆனார். இசையமைப்புக்களுக்கு இன்றியமையாத சுர இயைபுகள் (harmony) பற்றிய அறிவை இவர் நூல்களை வாசிப்பதன் மூலம் அறிந்துகொண்டாரே அன்றி முறையான பயிற்சி பெறவில்லை. இவரது தொடக்ககால இசையமைப்புக்களிற் பெரும்பாலானவை குறைவான எண்ணிக்கை கொண்ட இசைக்கலைஞர்களைக் கொண்டவையாகும்.