மதுரை இளம்பாலாசிரியன் சேந்தன் கூத்தனார்

இளம்பாலாசிரியன் = இளஞ்சிறுவர்களுக்குப் பாடம் சொல்லித்தரும் ஆசிரியன்
சேந்தன் - இந்தப் புலவர் கூத்தனாரின் தந்தை. சேந்தன் என்னும் பெயர் சேயோனாகிய முருகனைக் குறிக்கும்.

இரவில் தலைவிக்காகத் தலைவன் காத்திருக்கிறான். அதனை அறியாதவள் போலத் தலைவி தோழியிடம் சொல்கிறாள்.

நாடன் நேற்று வந்தான். இன்று என்ன ஆனான் என்று தெரியவில்லை. ஊர் அலர் தூற்றுகிறது. என் நெற்றி அவனை நினைத்துப் பசந்து கிடக்கிறது. இது என்ன ஆகுமோ தெரியவில்லை - என்கிறாள்.

கானவன் உளைமானைப் போல வலிமை படைத்தவன். தினைக்காவலுக்கு வந்தவன் நன்றாகக் குடித்துவிட்டுக் கழுது என்னும் பரண்மேல் கிடக்கிறான்.

கொடிச்சி தன் கூந்தலை சந்தனப் புகையில் உலர்த்திக்கொண்டு குறிஞ்சிப்பண் பாடுகிறாள். அதனைக் கானவனும் கேட்கவில்லை. தினையை மேயாமல் உறங்கும் யானையும் கேட்டபாடில்லை. இப்படிப்பட்ட நாட்டுத் தலைவன்தான் இந்தப் பாடலின் தலைவன்.

நாடனைத் தேறிய என் நெஞ்சம் இனி என்ன ஆகும்? என்று தலைவி தோழியை வினவுகிறாள்.

அவன் குன்றநாடன். அவன் குன்றில் யானை நீர் பருகும் சுனையில் பூத்திருக்கும் நீல மலர் போல அவள் கண் பூத்திருக்கிறது. அவன் அவளுக்காகக் காத்திருக்கிறான். அவள் தாய் வேலனை அழைத்து முருகாற்றுப்படுத்தும் விழா நடத்துகிறாள்.

இந்தச் செய்திகளைச் சொல்லித் தோழி அவளோடு(தலைவியோடு) உரையாடிக்கொண்டிருப்பதாக இந்தப் பாடல் சொல்கிறது.