பிலிப் ஜான்சன்

ஜான்சன் ஓஹியோவிலுள்ள கிளீவ்லாந்தில் பிறந்தார். இவர் நியூ யார்க், டர்ரிடவுனில் உள்ள ஹாக்லி பாடசாலையில் கல்வி கற்றார். பின்னர் ஹார்வார்ட் பல்கலைக்கழகத்தில், வரலாறும், தத்துவமும் பயின்றார். ஜான்சன் பல முறை ஐரோப்பிய நாடுகளுக்கு மேற்கொண்ட நீண்ட பயணங்களினால் அடிக்கடி அவரது படிப்பு தடைப்பட்டது. எனினும் இப்பயணங்கள் இவரது கல்வியில் முக்கிய திருப்பு முனையாக அமைந்தன. இவர் பார்த்தினன் போன்ற பல வரலாற்றுச் சின்னங்களுக்குச் சென்று பார்த்ததன் மூலம், கட்டிடக்கலை மீது அவரது ஆர்வம் வளர்ந்தது.

1928 ஆம் ஆண்டில் இவர், அக்காலத்தில், பார்சிலோனா கண்காட்சிக்கான ஜெர்மனியில் காட்சி மண்டபத்துக்கு வடிவமைப்புச் செய்து கொண்டிருந்த பௌஹவுசைச் சேர்ந்த கட்டிடக்கலைஞரான லுட்விக் மீஸ் வான் டெர் ரோவைச் சந்தித்தார். இந்தச் சந்திப்பு ஜான்சனுக்கு மிக முக்கியமாக அமைந்ததுடன், இவ்விருவருக்கிடையான, ஒத்துழைப்பு, போட்டி என்பவை கொண்ட ஒரு வாழ்நாள் முழுதும் தொடர்ந்த ஒரு தொடர்பின் அடிப்படையாகவும் அமைந்தது. மாணவன், தனது ஆசானை அடையாளம் கண்டுகொள்ள உதவிய சந்திப்பு அது.