பஃறுளி

குமரியில் நீராடிவிட்டு திருப்பதிப் பெருமாளைக் கண்டு வணங்கச் சென்றுகொண்டிருந்த மாடலன் என்னும் மறையவன் தென்னவன் என்னும் பாண்டிய மன்னரின் பரம்பரைப் பெருமைகளைச் சொல்லி வாழ்த்துகிறான். (காதை 11)

1. கடலில் வேல் வீசியது
2. கங்கையும், இமயமும் கொண்டது
3. இந்திரன் தலையிலிருந்த முடி வளையத்தை உடைத்து அவன் முத்தாரத்தைப் பிடுங்கித் தன் மார்பில் அணிந்துகொண்டது - ஆகிய சிறப்புகள்.

'அடியில் தன் அளவு அரசர்க்கு உணர்த்தி, வடிவேல் எறிந்த வான்பகை பொறாது, பஃறுளி ஆற்றுடன் பன்மலை அடுக்கத்துக் குமரிக் கோடும் கொடுங்கடல் கொள்ள, வடதிசைக் கங்கையும் இமயமும் கொண்டு, தென்திசை ஆண்ட தென்னவன் வாழி' - இப்படித் தென்னவன் வாழ்த்தப்படுகிறான்.

இளஞ்சேரல் இரும்பொறை குட்டம் தொலைய வேல் இட்டானாம். குட்டம் என்றால் என்ன? 'நெடுநீர்க் குட்டத்துத் துடுமெனப் பாயந்து' என்னும்போது குட்டம் என்பது குளம் எனப் பொருள்படுவதைக் காணலாம். அதன் வழி அணுகினால் இந்த அரசன் வேலால் குளத்துக்குத் தடுப்பு அமைத்ததை உணரமுடியும். (பதிற்றுப்பத்து 89)

சேரன் செங்குட்டுவன் தன் நகருக்குள் புகுந்த கடலைப் பின்வாங்கச் செய்தான். கடல் அரிப்பைத் தடுத்தான். பாறை வேலி போட்டுத் தடுத்தான் போலும்.

கடல் நிலவயலில் பாய்ந்து வற்றுமிடம் வடிம்பு. உப்பு விளைவிக்க இது பயன்படும். வடிம்பலம்ப நின்ற பாண்டியன் இதனை நன்கு பயன்படுத்திக்கொண்டவன்.