அடுக்கேற்றம்

அடுக்கேற்றம் (Exponentiation) என்பது ஒரு கணிதச் செய்கை. இதை bⁿ என்று குறிப்பது வழக்கம். இதில், b என்பதை அடி எனவும், n ஐ அடுக்கு அல்லது படி எனவும் அழைப்பர். n நேர் முழு எண்ணாக இருக்கும்போது, அடுக்கேற்றம், b ஐ n தடவைகள் தொடர்ச்சியாகப் பெருக்குவதாக இருக்கும்.

${\displaystyle b^{n}=\underbrace {b\times \cdots \times b} _{n},}$

அடுக்கு பொதுவாக அடியின் வலப்பக்கத்தில் மேலெழுத்தாகக் குறிக்கப்படும். bⁿ என்னும் அடுக்கேற்றத்தை b இன் n ஆவது அடுக்கு என்றோ, b இன் n ஆம் படி என்றோ வாசிப்பது வழக்கம். சில அடுக்கேற்றங்களைச் சில சமயங்களில் அவற்றுக்கேயுரிய தனியான சொற்களால் குறிப்பிடுவர். எடுத்துக்காட்டாக b² என்பதை b இன் வர்க்கம் எனவும், b³ என்பதை b இன் கனம் எனவும் வாசிப்பதுண்டு.