அ. திருமலைமுத்துசுவாமி

திருநெல்வேலி மாவட்டம் நாங்குநேரி என்னும் ஊரில் வாழ்ந்த தமிழாசிரியர் அருணாசலம் பிள்ளை – மங்கையர்க்கரசி என்னும் இணையருக்குத் தலைமகனாக 1928 - ? - ? ஆம் நாள் பிறந்தார். இவருடன் சங்கரவள்ளி நாயகம், சுப்பிரமணியன், காமாட்சி மற்றும் ஒருவர் இவருடன் பிறந்தவர்கள் ஆவர்.[1]

சென்னை பச்சையப்பன் கல்லூரியில் பேராசிரியர்கள் அ. மு. பரமசிவானந்தம், முனைவர் மு. வரதராசன் ஆகியோரிடம் பயின்று தமிழிலக்கியத்தில் சிறப்பு இளங்கலைப் பட்டம் (BA - Hons) பெற்றார். இப்பட்டம் கலை முதுவர் பட்டத்திற்கு இணையானதாகும். பின்னர் கல்வியியல் இளவர் (Bachelor of Teaching) பட்டமும் நூலக அறிவியல் பட்டயமும் (Diploma in Library Science) பெற்றார். தமிழிலக்கியத்தில் ஆய்வுசெய்து 1967ஆம் ஆண்டில் இலக்கிய முதுவர் (Master of Literature) என்னும் பட்டமும் பெற்றார். 1973 -74 ஆம் ஆண்டில் கர்நாடகப் பல்கலைக் கழகத்தில் நூலகவியல் முதுவர் பட்டப்படிப்பில் (M.Lib.Sc.) பல்கலைக் கழக முதல்வராகத் தேறி பொற்பதக்கம் பெற்றார்.[2]

திருநெல்வேலியில் உள்ள மதுரை திரவியம் தாயுமானவர் இந்து கல்லூரியில் தமிழ் விரிவுரையாளராகப் பணியாற்றினார்.[3]

1953ஆம் ஆண்டில் நெல்லை மாவட்ட மைய நூலகத்தில் நூலகராகப் பணியாற்றினார்.

1955 சூன் முதல் 1960 ஏப்ரல் வரை மதுரை தியாகராசர் கல்லூரியில் நூலகத் துறைத் தலைவராகப் பணியாற்றினார்.

1960 சூலை முதல் 1977 வரை சென்னைப் பல்கலைக் கழக நூலகத்துறையில் விரிவுரையாளராகப் பணியாற்றினார்.[4] 1977 ஆம் ஆண்டு முதல் தான் மறையும் வரை மதுரை காமராசர் பல்கலைக் கழகத்தின் நூலகத்துறைத் தலைவராகப் பணியாற்றினார்.

1965 ஆம் ஆண்டில் ஐந்து மாதங்கள் கல்வியுலாவாக அமெரிக்க நாட்டிற்குச் சென்று திரும்பினார். அதனால் கிடைத்த பட்டறிவைக் கொண்டு நூலக நாட்டில் நூற்றியிருபது நாள்கள் என்னும் நூலை எழுதினார்.

தமிழிலும் நூலகவியலிலும் புலமைபெற்ற திருமலை முத்துசுவாமி, இவ்விரு துறைகளிலும் தமிழ். ஆங்கிலம் ஆகிய இரு மொழிகளிலும் நூல்களை எழுதியிருக்கிறார். அவை பின்வருமாறு:

சைவம், தமிழ், நூலகவியல் ஆகியவற்றில் துறைபோகியவராக இருந்த திருமலை முத்துசுவாமிக்கு பின்வரும் பட்டங்களும் பாராட்டுகளும் வழங்கப்பட்டன:

• அருங்கலைக்கோன் – குன்றக்குடி அடிகளார் வழங்கியது
• நூலகக் கலாநிதி – மதுரை ஆதினம் சோமசுந்தரத் தம்பிரான்
• யுனஸ்கோ மன்ற விருது
• அறநெறிச் செல்வர் – பூவாளூர் சைவ சித்தாந்த சபை
• சைவமணி

திருமலை முத்துசுவாமி, பகவதி என்பவரை மணந்தார்.

திருமலை முத்துசுவாமி மதுரை காமராசர் பல்கலைக் கழகத்தில் பணியாற்றும்பொழுது 1980ஆம் ஆண்டில் மஞ்சள் காமாலை நோய்க்கு ஆட்பட்டு மரணமடைந்தார்.

1. திருமலை முத்துசுவாமி; முதலுதவி; திண்டுக்கல் பப்ளிஷிங் ஹவுஸ், திண்டுக்கல்; முதற்பதிப்பு 1955; பக்.1
2. திருமலை முத்துசுவாமி அ; நூலகவியல் சிந்தனைகள்; தமிழ்ப்பணி வெளியீடு, சென்னை; 1975; பின்னட்டை
3. திருமலைமுத்துசுவாமி அ; நூலக நாட்டில் நூற்றிருபது நாட்கள்; மீனாட்சி புத்தக நிலையம், மதுரை; 1967; பக். 1
4. திருமலைமுத்துசுவாமி அ; நூலக நாட்டில் நூற்றிருபது நாட்கள்; மீனாட்சி புத்தக நிலையம், மதுரை; 1967; பக். 2