വിനയെച്ചം

പൂർണ്ണക്രിയക്ക് മുമ്പ് നടക്കുന്ന അപൂർണ്ണക്രിയയാണ് മുൻവിനയെച്ചം. ഇതിന് പ്രത്യയമൊന്നും ചേർക്കേണ്ടതില്ല.ഓടിക്കയറി, ചാടിപ്പോയി എന്നിവ ഉദാഹരണം.

പൂർണ്ണക്രിയക്ക് പിമ്പ് നടക്കേണ്ട അപൂർണ്ണക്രിയയാണ് പിൻവിനയെച്ചം. ആൻ ആണ് ഇതിനുള്ള പ്രത്യയം. ധാതുവിനോട് നേരിട്ടോ ഭാവികാലരൂപത്തോടോ ആൻ പ്രത്യയം ചേർക്കാം.

ഉദാഹരണം:പഠിക്കാൻ ഇരുന്നു, കളിക്കാൻ പോയി, പാടാൻ പറഞ്ഞു.

കാലം,പ്രകാരം, പുരുഷൻ ഇത്യാദി ഉപാധികളൊന്നുമില്ലാതെ കേവലമായ ക്രിയയെയാണ് നടുവിനയെച്ചം കുറിക്കുന്നത്. ക, അ, ഉക എന്നിവയാണ് പ്രത്യയങ്ങൾ. ഉക എല്ലാ ധാതുക്കളോടും ചേർക്കാം. എന്നാൽ അ, ക എന്നിവ എല്ലാ ധാതുക്കളോടും ചേർക്കാറില്ല. പറ, പറക, പറയുക എന്നിവയാണ് നടുവിനയെച്ച രൂപങ്ങൾ.

പൂർണ്ണക്രിയ നടന്നുകൊണ്ടിരിക്കുമ്പോൾ തന്നെ നടക്കുന്ന അപൂർണ്ണക്രിയയാണ് തൻവിനയെച്ചം. എ, അവേ എന്നിവയാണ് പ്രത്യയങ്ങൾ. ചെയ്യ, ചെയ്യവേ എകാരം ദീർഘമായും പ്രയോഗിക്കാറുണ്ട്.

പൂർണ്ണക്രിയ നടക്കണമെങ്കിൽ നടക്കേണ്ട അപൂർണ്ണക്രിയയാണ് പാക്ഷിക വിനയെച്ചം. ആൽ, ഇൽ, ആകിൽ, എങ്കിൽ എന്നിവയാണ് പ്രത്യയങ്ങൾ.