മാരണം

കാളീപൂജയിലൂടെയാണ് മാരണകർമം നടത്തുന്നത്. മങ്ങിയ നിറമുള്ള പൂക്കളാണ് പൂജയ്ക്കുപയോഗിക്കേണ്ടത്. വീടിന്റെ അഗ്നികോണിനഭിമുഖമായി ഇരുന്നുകൊണ്ട് കറുത്തവാവ്, കറുത്തപക്ഷത്തിലെ പഞ്ചമി, അഷ്ടമി എന്നീ ദിവസങ്ങളിലും ഞായർ, ശനി, ചൊവ്വ എന്നീ ദിവസങ്ങളിലും മാരണം ചെയ്യാവുന്നതാണ് എന്നാണ് വിശ്വാസം. കരിങ്ങാലിച്ചമത കടുക്കെണ്ണയിൽ മുക്കി ഹോമിക്കുകയാണ് ചെയ്യേണ്ടത്.[2]

മാരണം ചെയ്യുമ്പോൾ കഴുതപ്പല്ലുകൊണ്ട് നിർമിച്ച ജപമാല ഉപയോഗിക്കുകയും പോത്തിൻ തോലിലിരിക്കുകയും ചെയ്യണം എന്ന് വിശ്വാസമുണ്ട്.[2] മന്ത്രവാദത്തിലെ ഷഡ്‌കർമ്മങ്ങളിൽ കളം വരയ്ക്കൽ ഒരു പ്രധാന ഭാഗമാണ്. പക്ഷേ മാട്ടൂട്ട് മാരണം, ദോഷപ്പണി എന്നീ പേരുകളിൽ അറിയപ്പെടുന്ന ദുർമന്ത്രവാദക്രീയകൾക്ക് കളം വരയ്ക്കാറില്ല.[3]

മലയാളത്തിൽ അപകടകരമായ വസ്തുക്കളെയും മറ്റും മാരണം എന്ന് വിശേഷിപ്പിക്കാറുണ്ട്.[4] വധിക്കുവാനുള്ള മന്ത്രം സംബന്ധിച്ചുള്ള വിശ്വാസം വിവിധ സംസ്കാരങ്ങളിൽ നിലവിലുണ്ട്. ജപ്പാനിൽ[5] ഇത്തരം മന്ത്രവാദത്തെപ്പറ്റിയുള്ള അദ്ധവിശ്വാസം നിലവിലുണ്ടായിരുന്നു. ഇത്തരം മന്ത്രവാദം ഇന്റർനെറ്റിലൂടെ വിൽക്കുന്നവർ പോലുമുണ്ട്.[6]

ഈ വിശ്വാസത്തിൽ നിന്ന് അകന്നു നിൽക്കണം എന്ന് ഉപദേശിക്കുന്ന ഇസ്ലാമികഗ്രന്ഥങ്ങളുണ്ട്.[7] ഐതിഹ്യമാലയിൽ തേവലശേരി നമ്പി എന്നയാളെപ്പറ്റിയുള്ള അതിശയോക്തിപരമായ വിവരണങ്ങളിൽ ഇദ്ദേഹത്തിന് മറ്റു മന്ത്രവിദ്യകളിൽ എന്ന പോലെ മാരണത്തിലും പ്രാവീണ്യമുണ്ടായിരുന്നു എന്ന് പറയുന്നുണ്ട്.[8]

ഖുറാനിലെ പതിനഞ്ചാമദ്ധ്യായത്തിലും (ഹിജ്റ്),[9] പതിനേഴാമദ്ധ്യായത്തിലും (ഇസ്റാഅ്),[10] ഇരുപത്താറാമദ്ധ്യായത്തിലും (ശുഅറാ)[11] മാരണത്തെപ്പറ്റി പ്രതിപാദിക്കുന്നുണ്ട്. ഹദീസുകളിലും (ബുഖാരി. 4. 51. 28) മാരണം വർജ്ജിക്കപ്പെടേണ്ട മഹാപാപമായി വിവരിക്കുന്നുണ്ട്.[12] മാരണം എന്ന വാക്ക് ഖുർആന്റെ മലയാളതർജ്ജമയിൽ ഉപയോഗിക്കുന്നത് മന്ത്രവാദം എന്ന അർ‌ത്ഥത്തിലാണ്.

വിവിധ സാഹിത്യ കൃതികളിലും[13] മരണമുണ്ടാക്കുന്ന മന്ത്രങ്ങളെപ്പറ്റി പ്രതിപാദിക്കപ്പെട്ടിട്ടുണ്ട്.

• മന്ത്രവാദം
• ശാന്തി
• വശ്യം
• സ്തംഭനം
• വിദ്വേഷണം
• ഉച്ചാടനം
• ഒടിവിദ്യ