പഴംപൊരി

വറുത്തുകഴിഞ്ഞ പഴംപൊരി

നാലുമണി പലഹാ‍രമായി അറിയപ്പെടുന്ന ഇത് തയ്യാറാക്കുന്നത് വളരെ എളുപ്പമാണ്. നന്നായി വിളഞ്ഞ് പഴുത്ത നേന്ത്രപ്പഴം,ഏത്തപഴം

ആണ് പഴം പൊരിയുടെ അടിസ്ഥാന ഘടകമായി വേണ്ടത്. 

നേന്ത്രക്കായ് തൊലി കളഞ്ഞ് മുഴുവനായോ രണ്ടായി പകുത്തോ തയ്യാറാക്കി വച്ചിരിക്കുന്ന മൈദ മാവിന്റെ കൂട്ടിൽ മുക്കി തിളച്ച എണ്ണയിൽ വറുത്തെടുക്കുന്നതാണ് പഴംപൊരി. എന്നാൽ പഴുക്കാത്ത കായ ചീന്തി ഇതുപോലെ കടലമാവിൽ പൊരിക്കാറുണ്ട്. ഇത് ബജ്ജി എന്നറിയപ്പെടുന്നു.

പഴുക്കാത്ത കായ ചെറുതായി നുറുക്കി എണ്ണയിൽ വറുത്തെടുക്കുന്നതിനേയും പഴംപൊരി എന്ന് പറയാറുണ്ട്. വീടുകളിൽ ഉണ്ടാക്കുന്നതിൽ നിന്ന് അല്പം വ്യത്യസ്തമായാണ്‌ വാണിജ്യാടിസ്ഥാനത്തിൽ നിർമ്മിക്കുന്നത്. ഇവിടെ പഴം ആവിയിൽ പുഴുങ്ങിയ ശേഷമോ മറ്റോ ആണ്‌ വറുത്തെടുക്കുന്നത്.

പഴം പൊരിയുടെ മാവിൽ അല്പം അരിപ്പൊടിയും പഞ്ചസാരയും ജീരകവും ഒരു നുള്ള് മഞ്ഞൾ പൊടിയും ചേർത്ത് കലക്കാറുണ്ട്.